Бу күннэргэ Тымныы полюһа Өймөкөөн улууһугар олорор Аҕыйах ахсааннаах норуоттар ассоциациялара тэриллибитэ 30 сыллаах үбүлүөйүн бэлиэтээтэ.
Томтор нэһилиэгин эбээннэрин актыыбын сэкирэтээрэ , “Өймөкөөн” кэммиэрчэскэйэ суох уопсастыбаннай тэрилтэ бырабылыанньатын чилиэнэ Валентина Прокопьева тэрээһин Роспотребнадзор бары санитарнай-эпидемиологическай ирдэбилин тутуһан ыытыллыбытын иһитиннэрэн туран, суолтатын быһаарда:
— 30 сыллааҕыта Томтор нэһилиэгин баһылыга Спиридон Слепцов актыыбынай эбээн дьонуттан турар уопсастыбаннай тэрилтэ тэрийбитэ. Сыл аайы кэккэбит хаҥаан, ассоциацияҕа тиийэ элбээбиппит. Билигин Спиридон Васильневич төрөппүт оҕолоро – иккиэн аатырбыт учуонайдарга тиийэ үүннүлэр. Кыыһа Снежана Спиридоновна – медицинскэй наука доктора, уола Спиридон Спиридонович – биологическай наука кандидата, аҕатын уонна ийэтин РФ үтүөлээх учуутала Мария Боярова туйахтарын хатаран, кэскиллээх кыраайы үөрэтээччи. Ассоциация эмиэ биир киэн туттуута – Төрүт нэһилиэгин киэн туттар ыччата, көҥүл тустууга ааттаах-суоллаах спортсмен, краповай берет хаһаайына Рустам Машарипов, “Мола” родовой община хаһаайына Илья Тарков дьиэ кэргэнин кытта – уола Яков, кыыһа Оксана, кэргэнэ Марианна Дмитриевна – ассоциациябыт киэн туттар дьоно. Тарковтар уопсастыбаннай тэрилтэбит хайа күн тэриллиэҕиттэн күн бүгүҥҥэ диэри саамай актыбыыстара уонна тутаах көмө буолар, өйүүр дьоно. Бу ааттаммыт дьон улуустааҕы дьаһалта истиҥ Махтал суруктарынан бэлиэтэннилэр.
Махталбытын тиэрдэбит “Өймөкөөн” кэммиэрсчэскэйэ суох уопсастыбаннай тэрилтэ салайааччытыгар Рустам Кривошапкиҥҥа. Кини салайар тэрилтэтин бырабылыанньата Дьокуускай куорат биир саамай биллэр “Адантис” тиис эмтиир тэрилтэтин өҥөтүнэн туһанар Сэртипикээти ассоциация биир баар суох тутаах киһитигэр, педагогическай үлэ бэтэрээнэ Елизавета Ашеинаҕа туттарда.
Улуус баһылыга Иннокентий Сивцев улуус биир биллэр-көстөр уопсастыбаннай тэрилтэтин актыбыыстарын Валентина Прокопьеваны уонна Елизавета Ашеинаны улууска аҕыйах ахсааннаах норуоттары түмэн, 30 сылы быһа араас ис хоһоонноох үлэни ыытан кэлбиттэригэр ис сүрэҕиттэн махтанна уонна Махтал суруктары туттарда.
Оттон улуус биллэр актыбыыската Валентина Прокопьева бу күн өссө биир үөрүүлээх наҕарааданан бэлиэтэннэ.
Нэһилиэк баһылыга Никифор Протопопопов Валентина Николаевнаҕа «Томтор нэһилиэгин Бочуоттаах олохтооҕо» суолталаах бэлиэни туттарда.
30 сыллаах үбүлүөйдэригэр Өймөкөөн улууһун аҕыйах ахсааннаах норуоттарын ассоциацията Манчаары оонньууларыгар кыттыбыт «сулустары» уонна быыстапкаҕа Өлүөхүмэ улууһугар ыытыллыбыт Олоҥхо Ыһыаҕын быыстапкатыгар миэстэлэспит биир дойдулаахтарын чиэстээтилэр.
Бэлэтээн эттэххэ, Манчаары оонньуутугар бэлиэтэммит спортсменнар бары — аҕыйах ахсааннаах норуоттар бэрэстэбиитэллэрэ.
Өймөкөөн улууһун тарбахха баттанар уопсастыбаннай тэрилтэтигэр өссө да үрдүк ситиһиилэри баҕарабыт!
Елена ПОТОЦКАЯ, «Саха сирэ» хаһыат.
Хаартыска — Валентина Прокопьева тиксэриитэ.