Бу күннэргэ Өймөкөөн улууһун баһылыга Иннокентий Сивцев тыа сирин нэһилиэктэрин баһылыктарын кытта көрсөн, быйыл Горнай улууһугар ыытыллыахтаах Манчаары оонньууларыгар кыттыы боппуруоһун дьүүллэстэ.
Улууска спорт сайдыытыгар туһуламмыт “төгүрүк остуолга” оскуола дириэктэрдэрэ, спортивнай оскуолалар тириэньэрдэрэ, спортсменнар кыттыыны ыллылар. Үгүс боппуруоһу сиһилии ырытан баран, улуус спортивнай уопсастыбаннаһа “тус-туспа сылдьан бүтүөххэ, Чэбдигирии сылыгар бары санаабытын бииргэ түмэн, сайдыы суолун тобулуохха, иннибит диэки тутуспутунан бииргэ хардыылыахха” диэн санааҕа кэллилэр.
Улуус баһылыга Иннокентий Сивцев көҕүлээһининэн Өймөкөөн улууһугар кэмиэрчэскэйэ суох Спорду сайыннарыы пуондата тэрилиннэ. Саҥа уопсастыбаннай тэрилтэ салайааччытынан Өймөкөөн спортсменнара биир дойдулаахтарын Александр Оконешниковы таллылар.
Пуонда кыахтаах спортсменнар өрөспүүбүлүкэтээҕи, дойду киин куораттарыгар ыытыллар күрэхтэһиилэргэ кытталларыгар, нэһилиэктэри спортивнай тэриллэринэн хааччыйыыга үлэлэһиэҕэ.
Елена ПОТОЦКАЯ, «Саха сирэ» хаһыат, edersaas.ru