Маны аах Тыа хаһаайыстыбата

Тымныы полюһугар оту тиэйии сэтинньи саҥатыттан саҕаланыаҕа

Курааннаабыт улуустарга бу дьыл от ыйын 29 күнүгэр Ил Дархан Айсен Николаев ыйааҕынан, эригийиэннээҕи ыксаллаах быһыы-майгы биллэриллибитэ. Ол улуустар испииһэктэригэр Өймөкөөн оройуона эмиэ киирбитэ.

СӨ Тыа хаһаайыстыбатын министиэристибэтэ курааннаабыт улуустарга оту Уһук Илин уокуругуттан тиэйэргэ быһаарыныыны ылыммыта. Өймөкөөн улууһун салалтата атырдьах ыйыгар Магадаан уобалаһыгар тиийэн, уобалас аатырбыт бааһынай хаһаайыстыбатын урбаанньыта Сергей Комары кытта кэпсэтэн, оту «Комарова» КФХ-тан тиэйэргэ кэпсэппитэ.

Оптуорунньукка, алтынньы 26 күнүгэр, улуус баһылыга Иннокентий Сивцев улуустааҕы тыа хаһаайыстыбатын управлениетын салалтатын, нэһилиэктэр баһылыктарын, бааһынай хаһаайыстыбалар салайааччыларын кытта куйаар ситиминэн сүбэ мунньаҕы ыытта. Онлайн эрэсииминэн ыытыллыбыт кэмпириэнсийэҕэ туһааннаах дьон интэриэһиргиир боппуруостарын, оту тиэйии харчытын хомуйуу, дуогабар пууннарын дьүүллэстилэр.

Оту Магадаан уобалаһыттан тиэйии эппиэттээх операторынан «Северное Графство» потребительскай кэпэрэтиип ананна.

2021 сыллааҕы 1 туонна от сыаната — 8000 солкуобай;

2020 сыллааҕы 1 туонна от сыаната — 6000 солкуобай.

Кэккэ боппуруостары ырытан, дьүүллэһэн баран, улуус баһылыга Иннокентий Сивцев: «Улууска Магадаан уобалаһыттан уопсайа 15 мөлүйүөн 600 тыһыынча солкуобайдаах суумаҕа 798 туонна оту тиэйэн аҕалыахтаахпыт. Быйылгы сыл бүтүөр диэри 399 туонна оту тиэйиэхтээхпит. От Сордоҥноох нэһилиэгиттэн ураты нэһилиэктэргэ барыларыгар тиэйиллиэҕэ. Сордоҥноох нэһилиэгэ эрэ быйылгы окко ылыммыт былаанын толордо.

Анал дуогабарга олоҕуран, оту тиэйии боппуруостарын сэтинньи 1 күнүгэр диэри быһааран баран, улахан тымныы түһүөн иннинэ нэһилиэктэргэ оту тиэйиини кэмигэр түмүктүүр сорук турар. Онон эппиэттээх дьон бу күннэргэ бу суолталаах боппуруоһу олохтоохтук быһаарыҥ», — диэн сорудахтаата.

Елена ПОТОЦКАЯ.

0
0