Бүгүн Өймөкөөн улууһун историятыгар киирэр икки үөрүүлээх сонун кэллэ.
edersaas.ru
Өймөкөөн нэһилиэгэр саҥа модульнай хочуолунай үлэҕэ киирдэ. Улууска туризм сайдыытыгар улахан кылааттаах, Саха сирин туристическай брендин быһыытынан аан дойдуга Тымныы полюһунан биллэр Өймөкөөн нэһилиэгин олохтоохторун Тымныы хаһаайына Чысхаан бэйэтинэн кэлэн эҕэрдэлээтэ. Кини «Теплоэнергосервис» АУо салайааччылырыгар уонна үлэһиттэригэр Тымныы полюһугар сылдьыбыттарын туһунан анал Туоһу сурук туттарда.
Интэриэһинэйэ баар, хочуолунай анал ааттаах. Хамыыһыйа улахан куонкуруска кыайбыт 11 кылаас үөрэнээччитэ Аида Сукулова «Илгэ» диэн ааттаабыт аатын талбыта.
Үөрүүлээх тэрээһини алгысчыт Андрей Иванов алҕаабытын кэннэ, оскуола боруогун саҥа атыллаабыт кырачааннар эҕэрдэ хоһоон тиэртилэр. Мустубут дьону кинилэр энергетиктэр көстүүмнэрин кэтэн тахсыбыттара эбии долгутта.
Нэһилиэк Ытык сүбэтин салайааччыта Вера Аммосова махтал тылларын тиэртэ. Улуус баһылыгын э.т. Игорь Водовозов хочуолунайы үлэҕэ киллэрбит «Теплоэнергосервис» АУо салайааччыларыгар Бочуотунай кырааматалары туттарда. Ол кэнниттэн олохтоохтор киэҥ-куоҥ саҥа хочуолунайдарын киирэн көрөн-истэн, бэрткэ астынан дьиэлэригэр тарҕастылар.
Эмиэ бу күн улуус киинин хабыллар ортотугар «Альянс» диэн аныгы баараҕай тутуулаах «супер-маркет» дэнэр киэҥ-куоҥ саҥа маҕаһыын аһылынна. Бу — Уус-Ньараҕа иккис улахан маҕаһыын. Киин куоракка баар «Айгуль», «Емеян», «В десятку» курдук аныгы тутуулаах «Нера» маҕаһыын бу иннинэ олохтоохтору угуйа турбута. Онон бу саҥа маҕаһыын киин уулуссаҕа арыллан, олохтоохтору эмиэ үөрдэрэ саарбаҕа суох.
Өймөкөөн улууһун олохтоохторо кыстыкка киириигэ бэртээхэй сонуннары истэн сүргэлэрэ көтөҕүннэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.