Тымныы полюһугар Өймөкөөҥҥө марафонец сиэри-туому толорор
Бүгүн Томтор нэһилиэгэр Өймөкөөн нэһилиэгиттэн итальянец Паоло Вентурини халыҥ хамаандатын кытта Томторго кэлэн, нэһилиэк дьаһалтатыгар сүүрүү туһунан тэрээһин боппуруоһун кэпсэттилэр.
edersaas.ru
Марафонец сүүрүүтэ сарсыарда 8.30 чаастан Томторго баар «Тымныы полюһа» стелаттан саҕаланыаҕа. Ол иннинэ 8 чаастан «Арчы» дьиэтигэр уоту аһатан, сиэри-туому толоруоҕа. Ол туһунан бүгүн тэрээһин мунньахха кэпсэттилэр.
— Былырыын сайын сири-дойдуну билсэ сылдьан, кыраайы үөрэтэр мусуойга анаан сылдьан көрбүтэ-истибитэ. Бириэмэлэрэ суох буолан, ханна да сылдьыбакка, тута төнүннүлэр. Мунньах кэнниттэн бары хаартыскаҕа түстүбүт, — диэн кэпсиир кыраайы үөрэтэр мусуой дириэктэрэ Розалия Дягилева.
Өймөкөөн нэһилиэгэр Кириһиэнньэ күнүгэр оһох оттон балаакка туруорбуттар да, Паоло Вентурини сөтүөлээбэтэх. Бука, сэрэйдэххэ, харыстаннаҕа буолуо.
— Кэргэнин кытта алаадьы ууран сирбитин аһатта. Бэйэбит уолаттарбыт Ньургун Попову кытта Анрей Сокорутов уонна «Россия-1» канал кэрэспэндьиэнэ сөтүөлээтилэр, — диэн кэпсиир Өймөкөөн кулуубун дириэктэрэ Ульяна Захарова.
Марафонец хамаандатын кытта Өймөкөөн нэһилиэгэр олохтоохтук оҥостон түһэ сытар. Сарсын сарсыарда Паоло Вентурини сүүрүүтүн түмүгүн аан дойду барыта эрэнэ кэтэһиэҕэ.
Елена ПОТОЦКАЯ, «Саза сирэ» хаһыат, edersaas.ru
Хаартыска — батсааптан.