Быйыл былаан быһыытынан Өймөкөөн улууһугар 3 800 киһи сыстыганнаах дьаҥтан быһыыны ылыахтаах.
Улууска коронавирус дьаҥыттан быһыыны ылыы таһыма хайдаҕын улуустааҕы киин балыыһа кылаабынай бырааһа Ираида ХАРЛАМПЬЕВА билиһиннэрдэ:
– Бүгүҥҥү туругунан улууска 2 600 доза вакцина кэлэн турар. От ыйын 2 күнүгэр уопсайа 900 доза кэлбититтэн (400 доза – «ГамКовидВак», 500 доза – «ЭпивакКорона» вакцина) баара суоҕа 20 доза «ГамКовидВак» уонна 231 доза «ЭпивакКорона» вакциналар хааллылар.
Оройуон үрдүнэн быһыыны ылыыга дьон көхтөөх кыттыыны ылар. Ол курдук, улуус киинин Уус-Ньара тэрилтэлэрин үлэһиттэрэ тэрээһиннээхтик кэлэн вакцинацияны аастылар. Тус бэйэм Өймөкөөҥҥө, Томторго, Аартыкка, Төрүккэ тиийэн быһыыны биэриигэ кытынным, миэстэтигэр тиийэн, эмчиттэр үлэлиир усулуобуйалырн көрдүм-иһиттим, ыарыһахтар туруктарын билистим.
Маны таһынан, улуустааҕы көмүс хостуур тэрилтэлэр эмиэ көхтөөхтүк быһыы ылан эрэллэрин бэлиэтиир тоҕоостоох.
Кэрэхсэбиллээҕэ баар, горняктар кэккэлэригэр Өймөкөөн улууһун олохтоох ыччаттара бааллар. Кинилэр эмиэ быһыыны ыллылар.
Хомойуох иһин, тыа сирин нэһилиэктэригэр быһыыны ылыы бытаан. Дьон социальнай ситимнэргэ тахсар араас бигэргэммэтэх иһитиннэриилэргэ итэҕэйэн, хобу-сиби истэн, бэйэлэрин доруобуйаларыгар олус наадалаах хампаанньаны көтүтэн эрэллэр. Бу күннэргэ нэһилиэктэр баһылыктарыгар олохтоох нэһилиэнньэ сыстыганнаах дьаҥтан быһыыны толору ыларын хааччыйалларын туһугар туһааннаах суруктары ыыттыбыт.
Улуус киин балыыһатын кылаабынай бырааһа Ираида Харлампьева ити курдук сыстыганнаах дьаҥ кэмигэр балаһыанньаны кытаанахтык хонтуруоллуу олорор буолан, өрөспүүбүлүкэ биир бөдөҥ киириилээх-тахсыылаах промышленнай улууһугар балаһыанньа этэҥҥэ.
Елена ПОТОЦКАЯ, «Саха сирэ» хаһыат, edersaas.ru