Бу өрөбүллэргэ Өймөкөөн улууһугар «Өймөкөөн — Тымныы полюһа» кыһыҥҥы туризм бэстибээлин 20-с үбүлүөйдээх тэрээһинэ саҕаланна.
Бу күннэргэ Томтор нэһилиэгэр өрөспүүбүлүкэ араас улуустарыттан, дойду киин эригийиэннэриттэн 200-чэкэ турист тоҕуоруһа муһунна. Үөрүүлээх тэрээһиҥҥэ СӨ Бырабыыталыстыбатын Бэрэссэдээтэлэ Андрей Тарасенко кыттыыны ылыаҕа. Быйылгы үбүлүөйдээх тэрээһин бары санитарнай-эпидемиологическай ирдэбили тутуһан ыытыллар буолан, кыһыҥҥы туризм үбүлүөйдээх бэстибээлин арыйыы сиэрэ-туома, бары тэрээһиннэр «Алыһардаах» күөлгэ ыытыллыахтара.
Бочуоттаах ыалдьыттар истэригэр Санкт-Петербург куораттан «Аан дойду киһитэ», «Асса» уус-уран киинэҕэ сүрүн оруолу оонньообут айар куттаах блогер, худуоһунньук Сергей Бугаев, Москваттан Бүтүн Сойуустааҕы Арассыыйа норуоттарын ассамблеятын ыччат салаатын салайааччыта Дина Громатикополо, «Ыалдьыты көрсүү национальнай уратыта» бырайыак эспиэрэ Мария Артамонова, Дьокуускайтан социологическай наука дуоктара Ульяна Винокурова, Үөһээ Бүлүүттэн, Чурапчыттан, Тааттаттан Өксөкүлээх айаннаабыт сирдэринэн сылдьар «Үс Кут» эспэдииссийэ, Тааттаттан олоҥхоһуттар бөлөхтөрө айаннаан кэллилэр.
Тэрээһиннэри салгыы сырдатыахпыт.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскалара.