Кулун тутар 22 күнүгэр киэһэ 19:30 ч. 202-с микро-оройуон Муус пааркатыгар «Тымныы полюһугар айан» өрөспүүбүлүкэтээҕи кыһыҥҥы туризм бэстибээлигэр авто-ралли кыттыылаахтарын атаарыахтара. Бирииһи Дьокуускай баһылыга Айсен Николаев туруорар.
Елена ПОТОЦКАЯ, «Саха сирэ» хаһыат, edersaas.ru
Бу туһунан «Мамонт» кулууп салайааччыта, массыынанан айан спортивнай күрэхтэһиитин хамыыһыйатын бэрэссэдээтэлэ Семен Оготоев бүгүҥҥү брифиҥҥэ иһитиннэрдэ:
— Ралли-рейдэ (массыынанан күрэхтэһиини) аан бастаан 2011 сыллаахха, Өймөкөөн улууһа төрүттэммитэ 80 сылын туолуутугар, тэрийбиппит. Ол кэмтэн ыла Дьокуускай баһылыгын бирииһигэр маннык тэрээһин биэс сылы быһа тохтообокко ыытыллар. Тымныы полюһугар ким кимин быһаарар бириис пуондата быйыл улаатта — 180 тыһ. солк.: бастакы миэстэ — 80 тыһ. солк., иккис миэстэ — 60 тыһ. солк., үһүс миэстэ — 40 тыһ. солк. Быйыл алтыс сылбытыгар, Өймөкөөҥҥө буолар кыһыҥҥы туризм бэстибээлигэр киин куорат баһылыга Айсен Николаев бэйэтинэн кыттар.
Быйылгы ралли-рейдэ урукку сыллардааҕар уратылаах. Бастатан туран, кыттааччыта элбэх — 17 хамаанда. Иккиһинэн, туристическай хайысхалаах буолан, «Халыма» федеральнай суола ааһар улуустара ралли-рейдэ тэрээһиҥҥэ эмиэ кыттыахтара. Ол курдук, быйыл хамаандалар Мэҥэ Хаҥалас Төҥүлүтүттэн күрэхтэһиигэ түһүнүөхтэрэ. Урукку сылларга Дьокуускайтан эбэтэр Аллараа Бэстээхтэн саҕалыыллара.
Ыраах айаҥҥа турунар айанньыттары мэр Айсен Николаев, «Халыма» федеральнай суол ааһар улуустарын баһылыктара алгыс тылы этэн атаарыахтара. Оттон Өймөкөөн улууһун баһылыга Михаил Захаров Тымныы полюһун Чысхаана ыалдьыттары көрсөргө бэлэмин иһитиннэрэн туран, ралли-рейд кыттыылаахтарын Өймөкөөҥҥө ыалдьыттата ыҥырыаҕа.
Елена ПОТОЦКАЯ, «Саха сирэ хаһыат, edersaas.ru