Өймөкөөн улууһун Томтор нэһилиэгин “Рабочай” түөлбэтин 40-ча дьиэтин киин ититии тиһигэр холбооһун туһунан олохтоохтор салайааччылар араас таһымнаах мунньахтарыгар өрүүтүн туруорсар сытыы боппуруостарынан буолар.
Соторутааҕыта буолбут оробуочай мунньахха бу кыаллыбат боппуруос оннуттан дьэ хамсыах курдук буолла. Суолталаах тэрээһини улуус баһылыга Иннокентий Сивцев Ил Түмэн 34 №-дээх Халыма-Индигиир уокуругун дьокутаата Сахамин Афанасьевы кытта көҕүлээн тэрийдилэр. Көрүллэр боппуруостар – Томтор уонна Биэрэк Үрдэ нэһилиэктэригэр олорор дьиэлэри киин ититэр тиһиккэ холбооһун.
Куйаар ситиминэн ыытыллыбыт мунньахха СӨ ОДьКХ миниистирин бастакы солбуйааччы Виктор Романов, «Теплоэнергосервис» АО салатата, улуус баһылыга Иннокентий Сивцев, Томтор уонна Өймөкөөн муниципальнай тэриллиилэрин баһылыктара Алексей Винокуров уонна Павел Васильев кыттыыны ыллылар.
— Мунньахха «Теплоэнергосервис» АУо салалтата 2023 сыллааҕы Инвестиционнай бырагыраамаҕа Томторго хочуолунай тутуутун (терморобот) уонна онно Рабочай түөлбэ 40 чааһынай дьиэтин холбуур туһунан боппуруоһу киллэрэллэрин туһунан эттэ. «Теплоэнергосервис» АУо салалтата Инвестиционнай бырагыраамаҕа «РусГидро» ПАО-ны кытта тустаах сүбэлэһиигэ уларытыыны киллэрбиттэрин иһитиннэрдэ. Маны таһынан, тэрилтэ Биэрэк Үрдүгэр саҥа хочуолунайы тутууга миэстэтигэр оробуочай бөлөҕү ыытан, ирдэнэр докумуоннары толоруоҕа. Тэрилтэ салалтатыгар бу үлэни 2023-2024 сылларга ыытар туһунан «РусГидро» ПАО-ны уонна РФ энергиэтикэ министиэристибэтин кытта сөбүлэһиннэрэн баран, Инвестиционнай бырагыраамаҕа уларытыыны киллэрэгэ сорудахтанна.
Өймөкөөн нэһилиэгин баһылыга Павел Васильев Биэрэк Үрдүгэр оробуочай хамыыһыйа тиийэн үлэлииригэр сөптөөх өйөбүлү оҥоруоҕа. Томтор нэһилиэгин баһылыга Алексей Винокуров олохтоох нэһилиэнньэни кытта үлэлэһиэҕэ, — диэн муниципалитет баһылыга Иннокентий Сивцев бэлиэтээтэ.
Бу күннэргэ боротокуол сүнньүнэн өр сылларга туруорсубут биир суолталаах сытыы боппуруостара быһаарыллан эрэриттэн олохтоохтор сэргэхсийдилэр.
Елена ПОТОЦКАЯ, “Саха сирэ” хаһыат, edersaas.ru