Сүрүн Тыа хаһаайыстыбата

Өймөкөөн улууһа оту Магадан уобалаһыттан атыылаһыаҕа

Бу дьыл от ыйын 29 күнүгэр Ил Дархан Айсен Николаев ыйааҕынан улахан кураан турбутунан сибээстээн, өрөспүүбүлүкэ 10 улууһугар ыксаллаах быһыы-майгы эрэсиимэ биллэриллибитэ.

Ол улуустар истэригэр Өймөкөөн улууһа эмиэ киирбитэ. Тыа хаһаайыстыбатын министиэристибэтэ оту Уһук Илин эрийгийиэннэриттэн ыларга кэпсэтиини ыытан, улуус  салалтата оту ыаллыы Магадан уобалаһыттан атыылаһыаҕа.

Улуустааҕы дьаһалта пресс-киинэ иһитиннэрбитинэн, быйыл улууска  сүөһүнү кыстатарга 3 960 тн от наада. Бүгүҥҥү күҥҥэ 1 360 тн от оттонно. Ол эбэтэр 34,3%. Нэһилиэктэр мобильнай биригээдэлэрэ  53 тн оту оттоотулар. Ордук Өймөкөөн — 24,5% уонна Төрүт — 18,8% хаалан иһэллэр. Ол да буоллар, оттооһун былаанын 55-60% (2400-2600 тн.) толорор сорук турар.

Бу күннэргэ оройуон баһылыга Иннокентий Сивцев салайар бөлөҕө Магадан уобалаһыгар тиийэн,  “Комарова” бааһынай хаһаайыстыба салайааччыта Сергей Комары кытта көрүстэ.

Бөлөх састаабыгар фермердэр Михаил Итегелов уонна Григорий Сивцев сылдьан, оттуур ходуһалары көрдүлэр-иһиттилэр уонна от хаачыстыбатын үөрэттилэр.

Көрсүһүү сүнньүнэн өрүттэр бу күннэргэ улуус нэһилиэктэриттэн төһө от наадатын билсэн баран, балаҕан ыйын 1 күнүгэр диэри от сыанатын чуолкайдыахтара, тиэйии ороскуотун ааҕыахтара.

Елена ПОТОЦКАЯ, «Саха сирэ» хаһыат, edersaas.ru.

1
0