Култуура Маны аах

Тымныы полюһа Өймөкөөн Олоҥхо Ыһыаҕар бэлэмнэниини саҕалаата

Бу күннэргэ Олоҥхо дэкээдэтин чэрчитинэн 2023 сылга Өймөкөөн улууһугар ыытыллар Олоҥхо Ыһыаҕын тэрийээччилэрэ куйаар ситиминэн мунньахтаатылар.

Онлай-мунньахха СӨ  култуураҕа уонна духуобунаска сайдыытын миниистирин 1-кы солбуйааччы Владислав Левочкин, Олоҥхо тыйаатырын дириэктэрэ Мария Турантаева,  улуус баһылыга Иннокентий Сивцев,  улуустааҕы култуура управлениетын салайааччыта Аксинья Сивцева, нэһилиэктэр баһылыктара, улуус уопсастыбаннаһа кыттыыны ыллылар.

СӨ Ил Дархана Айсен Николаев дьаһалыгар олоҕуран СӨ  култуураҕа уонна духуобунаска сайдыытын миниистиэристибэтэ оробуочай хамыыһыйа састаабын талбыта. Бу күннэргэ ол хамыыһыйа тэрийэр үлэтин саҕалаата.

Тэрийэр кэмитиэт  түһэ Мария Турантаева Өймөкөөн улууһугар Олоҥхо ыһыаҕын сүрүн режиссерунан Павел Колесов анаммытын билиһиннэрдэ.

Салгыы тэрээһин бастакы мунньаҕы ыытарыгар Олоҥхо тыйаатырын дириэктэрэ Мария Турантаева кэккэ сытыы боппуруостарга тохтоото:

Кэлэр сыл балаҕан ыйыгар Олоҥхо Ыһыаҕар аналлаах научнай-практическай кэмпириэнсийэ тэрийиэхпит.  Бу олус эппиэттээх тэрээһин. Хайдах бу кэмпириэнсийэни ыытабыт да, Олоҥхо Ыһыаҕа оннук барыаҕа. Аҥардас Дьокуускайтан 150 киһи кыттара сабаҕаланар. Бу дьону түһэриэххэ, аһатыахха, көрсүөххэ наада. Онон Олоҥхо Ыһыаҕар бэлэмнэниигэ бу сүрүн бэлэмнэнэнии тэрээһининэн буолар. Ол кэннэ сыыһабытын-халтыбытын ырытыахпыт, көннөрөргө дьулуһуохпут.

Өймөкөөн улууһа аан дойдуга Тымныы полюһунан биллэр буолан, атын улуустарга тэҥнээтэххэ, манна олус элбэх омук сириттэн туристар кэлиэхтэрэ. Онон суола-ииһэ суох Дьааҥыга Олоҥхо Ыһыаҕар 1,5 тыһыынча ыалдьыт кэлбит эбит буоллаҕына, Өймөкөөҥҥө 5 тыһыынча киһи “Халыма” федеральнай суолунан тиийэрэ сабаҕаланар. Бу дьону барытын көрсөргө, түһэрэргэ, аһатарга эмиэ бэлэм буолуохха наада.

Куйаар ситиминэн ыытыллыбыт мунньахха улуус баһылыга Иннокентий Сивцев биир суолталаах боппуруоска тохтоото:

Сыстыганнаах дьаҥ пандемията саҕаланыан иннинээҕи былаанынан  Өймөкөөҥҥө  Олоҥхо Ыһыаҕын Халыма Индигиир уокуругуттан уонна  Арктика оройуоннарыттан  9 улуус кыттыһан  тэрийиэхтээх этибит. Кэлиҥҥи сылларга кэккэ биллэр төрүөтүнэн хоту улуустар кыттыһар боппуруостара аһаҕас турар.  Өскө урукку былаанынан тэрээһин ыытыллар буоллаҕына, Олоҥхо Ыһыаҕын ис хоһооно уларыйарыгар тиийэр. Ол ону бу күннэргэ быһаарыахха наада. 

Маныаха Мария Турантаева улуус баһылыгын этиитин кытта сөбүлэстэ:

Кырдьык, Өймөкөөн улууһа 7 эрэ муниципальнай тэриллиилээх буолан, киһитин ахсаана аҕыйаҕын учуоттаан, Халыма Индигиир улуустарын кыттыһыннарар баҕа баара. Ол эрээри сыстыганнаах дьаҥынан сибээстээн, хааччахтааһын миэрэлэрин кытаанахтахтык тутуһуу ирдэбилэ турар.  Бу боппуруоһу тэрийэр хамыыһыйаҕа дьүүллэһиэхпит. Ол эрээри Өймөкөөн улууһа — Олоҥхо Ыһыаҕа ыытыллар сирэ буолара чопчуланан, бары ирдэбили тутуһан, өрөспүүбүлүкэтээҕи суолталаах тэрээһин манна ыытыллыаҕа. 

 

Мунньах кыттыылаахтара сиһилии Олоҥхо Ыһыаҕа ыытыллар сирин ырыттылар, ханна туох тутуу барарын дьүүллэстилэр.

 

Елена ПОТОЦКАЯ, «Саха сирэ» хаһыат.

 

2
0
Telegram @edersaas20