Тымныы оройугар ороһулаан төрөөбүт Чысхаан кулунчуктан атыыр бэрдэ тахсыаҕа
Өймөкөөн Томторун эдэр бааһынайа Михаил Сивцев биир биэтэ сиргэ сылдьан, ахсынньы 23 күнүгэр төрөөбүтүн чуолкайдаан эттэ. Кини күтүөтэ Григорий ити күн тыраахтарынан от тиэйэн истэҕинэ, хаардаах тоҥ сиргэ саҥа түспүт кулунчук ийэтин аттыгар хааман байааттаҥныы сылдьар үһү. Биэ самыытыгар “М” (Мэхээлэ) диэн бэлиэлээҕин ыраахтан “Н” (Ньукулай) диэн көрбүт. Онон Николай Винокуров биэтэ төрөөбүтүн туһунан сыысхаллаах кэпсээн тарҕаммыт.
Михаил Сивцев биэтэ аҕыс саастааҕын, былырыын кытараан баайтаһырбытын, онтон сылтаан хойутаан, ахсынньыга оҕоломмутун кэпсээтэ. Онон, кулунчукпут эрдэһит буолбакка, ороһу эбит. Былырыын биир биэтэ балаҕан ыйыгар, икки биэтэ алтынньыга төрөөбүттэр үһү. “Биэ көрдөөтө даҕаны, атыыр ханна бараахтыай…” – диэн судургутук быһаарар уонна быйыл сылгы тоҥмот сөптөөх хаара түспүтүн, кулунчук туруга үчүгэйин, ааттаах атыыр буолар чинчилээҕин, Чысхаан диэн сүрэхтиир санаалааҕын эттэ.
Михаил 2015 сыллаахха бааһынай хаһаайыстыба тэриммит уонна Тыа хаһаайыстыбатын министиэристибэтэ тэрийэр куонкуруһугар кыттан, сылгы базатын туттарыгар судаарыстыбаттан 1 мөлүйүөн солкуобайдаах көмө үбү ылбыт. Убайа Баһылай эмиэ бааһынай хаһаайыстыбалаах эбит, 2000 сыллаахха саҕалаабыт. Сылгыларын иккиэн кыттыһан көрөллөр-туталлар. Тыйдарын кытта аахтахха, 183 улахан сылгылаахтар, 11 убаһа ийэлэриттэн араарыллан, аһылыкка тураллар. Аны саас төрүөх биэриэхтээх 136 биэлээхтэр.
Эдэр бааһынай дэннэр даҕаны, оҕо эрдэҕиттэн сыспай сиэллээххэ сыстыбыт уопуттаах сылгыһыт Михаил Сивцев Өймөкөөн чысхаан тымныытын тулуйар, халыҥ быһыылаах-таһаалаах Күрдьүөт (“Мэҥэдьэк” диэбит курдук) саха төрүт сылгытын салгыы тэнитэр бигэ санаалаах.
Хаартыскаҕа: Михаил Сивцев (хаҥастан бастакы) хаһаайыстыбатын сылгыһыта Артем Посельскайы кытта Арылыаска баар базаларыгар. Манна аҕыйах хонуктаах Чысхаан кулунчук ийэтин кытта 60 кыраадыс тымныыга аһаҕас халлаан анныгар кыстаан турар. Айылҕа оҕото диэн, дьэ бу буоллаҕа!
Василий НИКИФОРОВ, «Саха сирэ» хаһыат, edersaas.ru