Тымныы оҕуһун иккис муоһа түстэ!

Ааптар: 
Бөлөххө киир:

Бүгүн, олунньу 24 күнүгэр, тымныыбыт иччитэ Эһээ Дьыл оҕуһун иккис муоһа түстэ. Онон дьылбыт саамай тымныы кэмин этэҥҥэ туораатыбыт.

Ол гынан баран, туллан түспүт муостар син биир тымныынан аргыйан тоҥот, оҥоруулаах түүннэр, дьыбардаах сарсыардалар өссө да туруохтара. Оҕус муоһа күлүк сиргэ түстэҕинэ бытааннык ууллан  саас хойутаан кэлэр. Оттон күн көрөр ылааҥы сиригэр түстэҕинэ саас эрдэлиир.

Муостар ыам ыйын 22 күнүгэр тиийэн толору ууллан бүтэллэр. Дьэ оччоҕо эрэ тымныы кэм ааһан, дьылы тахсабыт, күөххэ үктэнэбит, саргылаах сайыҥҥы кэми көрсөбүт.

Сорохтор оҕуспут баһа булгуруйан, туллан түһэрин, онтон салгыы көҥдөй көхсө күр гына суулларын туһунан суруйаллар. Ити православнай аҕабыыттар олохтоох итэҕэли суох гынаары, баар-суох тымныыбыт иччитин өлөттөрө сатаабыттарын түмүгэ буолар. Ол сорох дьон өйүгэр-санаатыгар дириҥник иҥэн хаалбыт.

Эһээ Дьы оҕуһа — тымныы иччитинэн буолар. Иччилэр өлбөттөр. Таҥараианство итэҕэлин быһыытынан иччилэр сирдээҕи Айыылар буолаллар. Онон иччини өлөрө сатааһын бу бэйэҕэ аньыыны оҥостунуу.

Саха сирэ Аан дойдуга тымныытынан аатырар. Халлаан сылыйан истэҕин аайы тымныы суолтата өссө күүһүрүөҕэ, тымныы сыаналаах табаар буолуоҕа. Оччоҕо Саха сирин олохтоохторо тымныыбытын араас көрүҥнээн атыыга таһааран, дьэ байылыат олохтонуохпут. Онон тымныыбыт иччитин харыстыаҕыҥ, өлөрө-өһөрө сатаамыаҕыҥ, төттөрүтүн бренд оҥостуоҕуҥ!

Гавриил Угаров – Эһээ Дьыл,

биология билимин дуоктара, ХИФУ бэрэпиэссэрэ, суруйааччы.

+1
0
+1
0
+1
0
+1
0
+1
0
+1
0
+1
0