ТЫМНЫЫ ИЧЧИТИН МУОҺУН КЫЛААНА КЫЛАРЫЙДА

Ааптар: 
Бөлөххө киир:

Таҥарианство итэҕэлинэн туох барыта Иччилээх. Тымныы иччитинэн Эһээ Дьыл оҕуһа буолар. Бу оҕус муоһа тымныынан уһуура сылдьар, ол иһин Саха сиригэр кыһыммыт олус тымныы.
Өбүгэлэрбит саныылларынан бүгүн, тохсуньу ый 31 күнүгэр, Эһээ Дьыл оҕуһун – Тымныы Иччитин муоһун кылаана кыларыйда. Ол аата, Оҕус икки муоһун уһуга сыппаата, ону кытта Аан дойдуга аатырбыт Саха сирин бытарҕан тымныыта бу күнтэн ыла арыый мүлүрүйүөхтээх.
Дьэ ол гынан баран, Арассыыйа биир биллэр метеоролога эппитин курдук, быйылгы кыһыммыт «киһи кыбыстыан курдук (неприлично теплая зима) сылаас буолла. Холобурга, быйыл Дьокуускай куораппытыгар биирдэ даҕаны салгыммыт температурата –50 кыраадыстан аллара түспэтэ – тымныйбата.
Биһиэхэ элбэх биллэр дьылдьыттар баалларын билэбит. Ол гынан баран, кинилэртэн хайалара да бу быйылгы кыһыммыт сылаас буолуо диэн билгэлээбэтэҕэ… Ити, биллэн турар, кинилэр буруйдара буолбатах – дьылбыт-күммүт кэнники кэмҥэ олус уларыйда, улахан сылыйыы бара турар. Ону ол диэбэккэ былырыын эмиэ ким да көһүппэтэх тымныы кыһына буолбутун бары өйдүүр буолуохтааххыт.
Сорох дьоннор тохсунньу 31 күнүгэр Дьылларын оҕуһун аҥар муоһун түһэрэллэр. Сорох улуустарга оннук өйдөбүл баар. Ол гынан баран, Дабыл этэринэн, былыргы сахалар халлаан сулустарын бэркэ диэн кэтээн көрөллөрө. Онон кинилэр Телец сулустар бөлөхтөрүн Дьыл оҕуһа диэн ааттыыллар эбит. Билигин ити Телец сулустар бөлөхтөрүн муоһу көрдөрөр икки сулуһа олус чаҕылхайдык ырылыччы көстөллөр. Ол икки муостан биирдэстэрэ олунньу ый 12 күнүгэр халлаан сырдаан көстүбэт буолар, ону көрөн Дьылбыт оҕуһун бастакы муоһа тулунна дииллэрэ.
Онон Эһээ Дьыл оҕуһа, эбэтэр Тымныы иччитэ билигин да 2 муостаах, онон халлааммыт өссө да тымныы буолуоҕа.

Гавриил Угаров – Эһээ Дьыл,

биология билимин дуоктара, ХИФУ бэрэпиэссэрэ, суруйааччы

Хаартыска: Г.Угаров-Эһээ Дьыл тиксэриитэ

+1
0
+1
0
+1
0
+1
0
+1
0
+1
0
+1
0