Саха сиригэр бэйэ оҥоһугун араас хайысхата элбээн эрэрэ кэрэхсэбиллээх.
edersaas.ru
Саха сирин учуонайдара тымныыттан харыстанар кириэми оҥордулар. “Криопротект” ХЭТ сирэйи тымныыттан харыстыыр FREEZE POROTECT кириэми оҥорон атыыга таһаарбыта интэриэһи үөскэттэ. Бу туһунан биһиги бырайыак ааптара, биологическай наука дуоктара, тэрилтэ салайааччыта Ли Натальяны кытта кэпсэттибит.
— Кириэм састаабыгар туох киирэрий?
— Эмп састаабыгар үөҥҥэ-көйүүргэ саха тымныы кыһынын туоруурга көмөлөһөр криопротектордар киирэллэр. Холобур, лыахтар экстрактарын ылан туһанабыт. FREEZE POROTECT өр кэмҥэ таһырдьа тымныыга сылдьар табаһыттарга, сылгыһыттарга, балыксыттарга, туристарга, тымныытынан аатырар хоту улуустар олохтоохторугар ордук туһалаах.
— Кириэм хайдах туттулларый?
— Дьиэттэн тахсыах иннинэ тымныы хаарыйар сирин (иэдэһи, муруну, кулгаах эминньэҕин) аппликатор көмөтүнэн 3-5 мүнүүтэ ыксаабакка, кичэллээхтик сотуллар. FREEZE POROTECT кириэм баас үрдүнэн сотуллубат. 12 сааһын туола илик оҕоҕо сэрэхтээхтик туттуллар. Иҥэр бириэмэтигэр эмп кыратык иэдэһи аһытыан, хаарыйыан сөп. Көмөлөһөр бириэмэтэ 2-3 чаас. Наада буоллаҕына, хос соттуохха сөп.
— Оттон сөп түбэһиэ суоҕун сөп дуо?
— Эмкэ киирэр компоненнарга аллергиялыыр дьон сэрэниэхтэрин наада. Ону тэҥэ, дьахталлар тональнай кириэмэ суох туттуохтаахтар. Кириэми клиническэй өттүнэн Дьокуускай куоракка, Өлөөҥҥө уонна Өймөкөөҥҥө бэрэбиэркэлээбиппит. Холобура, Тымныы полюһугар Николай Находкин ЫБМ сулууспатын үлэһиттэрэ уонна соторутааҕыта Өймөкөөҥҥө тиийэн сүүрбүт Италия марафонеһа Паоло Вентурини, биирдиилээн дьон атыылаһан туһаммыттара.
— Кинилэр санааларын истибиккит дуо?
— Паоло Вентурини сөбүлээбит этэ. Ол эрээри марафонец: «Дьарыктанар, сүүрэр дьоҥҥо көлөһүннэрэ тахсан, мэһэйдиир эбит. Онон тиритэр гына хамсаммат дьоҥҥо туһалаах кириэм”, — диэн сыаналаабыта.
— Кириэми ханна атыылыылларый?
— Дьокуускай к. Октябрьскай уул. 23 «Наоми”, «Октябрьскай” уонна “Азия” атыы-эргиэн кииннэриттэн атыылаһыахха сөп.
Мин бу кириэми туттубут омук туристарын арыаллыыр Айар Варламов фейсбукка суруйбутун булан аахтым.
“Хайаан да кэнэҕэс бу кириэми туттар эбиппин! Сыаната да удамыр — 350 солк. FREEZE POROTECT кириэми оҥорбут учуонайдар тыйыс килиимэттээх усулуобуйаҕа олорор дьон олоҕун чэпчэтэллэрэ махталлаах суол!
Кувейтан кэлбит биир турист дьахтар: “Тымныыттан харыстанар туох да эмп суох дуо?” – диэн ыйытан турардаах. Маннык тэтиминэн сотору учуонайдарбыт тымныыны утары эми айыахтара турдаҕа!”, — диэн суруйбут.
Оттон туризмынан дьарыктанар Артем Петухов бэлиэтииринэн, бу кириэми альпинистар, балыксыттар хото туһаныахтарын сөп. Кини кыһын хайаҕа тахсарыгар бу кириэми туһаммыт эбит.
Кэрэхсэбиллээҕэ баар, кириэми туттарга быһаарыы сурук нууччалыы, сахалыы, английскайдыы суруктаах буолан, интэриэһи өссө тардар.
Дьэ, ити курдук Саха сирин учуонайдара аны тымныыттан харыстанар кириэми кытта оҥорон таһаарар буоллулар.
Елена ПОТОЦКАЯ, “Саха сирэ” хаһыат, edersaas.ru
Хаартыска – Наталья Ли архыыбыттан.