Бүлүү улууһун Тылгыны нэһилиэгин олохтоох дьаһалтатын дьоҥҥо-сэргэҕэ туһуламмыт бырагыраамалара олоххо киирэллэрин олохтоохтор олус сэргииллэр.
Бу туһунан нэһилиэк баһылыга Егор Иванов маннык кэпсиир:
— Бүгүҥҥү күҥҥэ тыа сиригэр дьиэ тутуутугар социальнай гаастааһын биир сүрүн өйөбүлүнэн буолар. Ил Түмэн дьокутаата Александр Гоголев бу боппуруоһу тус хонтуруолугар ылан олорор буолан, Тылгыныга саҥа дьиэни тутуу кэлиҥҥи сылларга элбээтэ.
Тылгыны олохтоохторо өр сылларга баҕа санаабыт — саҥа оскуола тутуута. Бу боппуруоһу улууспут баһылыга Сергей Винокуров өйөөн, оскуола-оҕо уһуйаанын тутуу бырайыага быһаарыллан, дьыала оннуттан хамсаан эрэриттэн үөрэбит. Манна биир дойдулаахпыт Николай Афанасьев, дьокутааппыт Макар Маисов биир сүбэнэн үлэлэһэ сылдьалларын бэлиэтиир тоҕоостоох. Ыччат тыа сиригэр олохсуйарын дьиҥнээх өйөбүлэ дьэ бу буолар!
Тылгыныга 2022 сылы ыччапптын өйүүр инниттэн Ыччат сылынан биллэрдибит. Маныаха быйылгыттан Ыччат бырагырааматын саҥартыбыт. Ол эбэтэр дохуота аҕыйах, саҥа дьиэ туттубут эдэр ыалга анал көмө иккис түһүмэҕэ үлэлиэҕэ. Бу 50 тыһыынча солкуобайдаах анал хайысхаларынан тыырыллыбыт көмө.
Маны таһынан, анал ирдэбилгэ олоҕуран, ыччаппыт көҕүлүүр тэрээһиннэрэ эмиэ эбии үбүлэниэхтэрэ.
Сыл түмүгүнэн көхтөөх, талааннаах ыччаты үөрүүлээх быһыыга-майгыга чиэстиэхпит.
Нэһилиэкпит олохтооҕун ахсаанын элбэтэр, эдэр ыаллары өйүүр инниттэн быйылгы Ыччат сылыгар Тылгыныга «Үйэ оҕолоругар» өрөспүүбүлүкэттэн бэриллэр 100 тыһ. солкуобайга эбии олохтоох дьаһалтаттан 50 тыһ. солкуобай бэриллиэҕэ.
Ити курдук, олохтоох салалта төрөөбүт Тылгыныларыгар элбэх оҕолонон-урууланан силис тардан, сис ыаллар элбии туралларыгар быйылгы Ыччат сыла үтүө түмүктээх буоларыгар эрэнэр.
Елена ПОТОЦКАЯ, «Саха сирэ» хаһыат.
Хаартыскалар: нэһилиэк олохтоох дьаһалтатын тиксэриитэ.