Урукку сылларга Бүлүү улууһун Тылгынытыгар дьахтар сэбиэтин үлэтэ күөстүү оргуйара.
edersaas.ru
Ол эрээри, кэлиҥҥи сылларга түмсүү уота-күөһэ умуллан барбыта. Быйыл нэһилиэк 100 сыллаах үбүлүөйүн көрсө, үгүс тэрээһиҥҥэ дьахтар аймах кыттан, дьахтар сэбиэтин үлэтин сөргүтэр туһунан этии киирбитэ. Бу туһунан олохтоох дьаһалта баһылыгын солбуйааччы Христина Васильева кэпсиир:
— Түмсүүбүтүн «Тылгыны кыргыттара» диэн ааттаатыбыт. Ийэҕэ, сааһыттан тутулуга суох, оҕото «кыыс» дэнэр буоллаҕа. Оттон биһиги Тылгыныбыт, барыбытыгар төрөппүт ийэбитигэр тэҥнээх күндүттэн күндү төрөөбүт дойдубут. «Тылгыны кыргыттара» түмсүүгэ олохтоох уонна мантан төрүттээх дьахталлар киирдибит. Төһө да атын сирдэргэ олордоллор, биир дойдулаахтарбыт биһигини кытта өрүү сибээстэһэ, дойдуларыгар кэлэ-бара сылдьаллар. Үлэбит сүрүннээн куйаар ситиминэн ыытыллар буолан, былааммыт үгүс. Этии киирэ турар. Ону сааһылаан, наардаан аттарыахпыт. Түмсүүбүтүн миигин кытта олохтоох дьаһалта кылаабынай исписэлииһэ Лариса Кириллина салайсар.
«Тылгыны кыргыттара» түмсүү былааныгар киирбит этиилэринэн үлэбит хайысхаларын торумнаатыбыт. Ол курдук, Экология, айылҕа харыстабылын хайысхатын Лариса Кириллина сүрүннүөҕэ. Тылгыныбыт үбүлүөйүгэр анаммыт кинигэ быыстапкатын учуутал Софья Колтовская бэлэмниир. Учуутал Олимпиада Васильева тиэргэн иһигэр дьиэ кэргэн быыстапкатын, былыргы малы дьоҥҥо көрдөрүүнү тэрийиигэ бэрт интэриэһинэй толкуйун олоххо киллэриэхпит. Орто оскуола учуутала Лидия Кузнецова «Мас хайытыыта» диэн сүтэн эрэр дьарыгы «үбүлүөй кэмигэр бэлэмниэххэ, ыалдьыттар оҕо саастарын санаан, мас хайытан көрдүнэр» диир.
Түмсүүбүтүн докумуоннаан, юридическэй сирэй оҥорон, араас өрөспүүбүлүкэтээҕи уопсастыбаннай тэрилтэлэр күрэстэригэр, граннарыгар кыттыбыт киһи диэн баҕа санаалаалаахпыт.
Билигин, уопсастыбаннай тэрилтэлэр суолталара күүһүрбүт кэмигэр, нэһилиэккэ дьахтар түмсүүтэ дьону көҕүлүүр оруолу ылара чахчы. Онон нэһилиэктэрин — 100, Ийэ дойдуга бэриниилээх буолуу сылларыгар Тылгыны дьахталлара бэйэлэригэр уонна биир дойдулаахтарыгар бэртээхэй бэлэҕи оҥордулар.
Елена ПОТОЦКАЯ, «Cаха сирэ» хаһыат, edersaas.ru