Маны аах Уопсастыба

Тылдьыт суолтата улахан, туттарга табыгастаах, түргэн

Ааспыт ыйга сүрэхтэммит edersaas.ru саайт тылдьытын туһунан «Айар» национальнай кинигэ кыһатын салайааччыта Август Егоров санаатын үллэстэр:

— Василий Мигалкин электроннай тылдьыта Саха сирин баһы­йар үгүс сирдэригэр түргэн интэриниэт тарҕаммыт, сыыппара эйгэтигэр киирии үгэнигэр саамай кэмигэр таҕыста дии саныыбын. Бу тылдьыты Феодосия Габышева үөрэх ми­­ниистиринэн, онтон бырабыыталыстыба бэрэссэдээтэлин солбуйааччынан үлэлии сылдьан, Тыл бэлиитикэтигэр сүбэ эп­­пиэттээх сэкиритээрэ Римма Жиркова уонна биһиги кыһабыт бу киһи үлэтигэр өйөбүл наада диэн киллэрбит этиибитин өйөөн, тылдьыты оҥорбут В.В.Мигалкиҥҥа Үөрэх министиэ­ристибэтиттэн үп-харчы көрдөрөн, саха тылын уонна литературатын кэбиниэттэригэр киллэртэрэн, өссө 10 сыл анараа өттүгэр «Саха Спеллер» диэн ааттанан, оччолорго CD диискэнэн оскуолаларынан тарҕаммыта.

Бу тылдьыт суолтата билиҥҥи кэмҥэ олус улахан, туттарга табыгастаах, түргэн. Кылаабынайа, интэриниэт баар буолуон наада. Үөрэнээччилэргэ, устудьуоннарга, учууталларга, тылбааһынан дьарыктанааччыларга, саха тылын үөрэтиэн баҕалаахтарга, уопсайынан, саха тыллаах дьоҥҥо кимиэхэ баҕарар, би­­һиэхэ эмиэ, бэчээт эйгэтин үлэһиттэригэр, олус көмөлөөх, туһалаах ­буолуоҕа.

Тылдьыкка итэҕэс-быһаҕас баар гынан баран, ситэриллэн-хоторуллан, тупсарыллан, эбиллэн истэҕинэ, холобура, тылын саппааһын өссө байыттахха, сахалыы таба суруйуу тылдьытын кытары дьүөрэлэһиннэрдэххэ, сахатытыы саҥа тиэриминнэрин киллэрдэххэ — суолтата, туттуллар ыыра, эйгэтэ өссө кэҥиэҕэ. Оччотугар бу тылдьыт инникитин туох баар интэри­ниэт ситимигэр сахалыыттан нууччалыы, нууччалыыттан сахалыы тута тыл­­баастыыр тиһиги оҥорорго сүрүн күүс, төрүт буолуон сөптөөх. Онон бу тылдьыты 20-тэн тахса сылы быһа сыралаһан туран оҥорбут В.В.Мигалкиҥҥа барҕа махтал буоллун!

0
0