Арассыыйа суруйааччыларын сойууһа быйыл иккис сылын “Арассыыйа, биһиги куоласпытын иһит” диэн уус-уран тылбааска куонкурус тэрийэн ыытар. Куонкуруска быйыл Саха сириттэн тылбаасчыт Альбина Борисова кыттан кыайыыны ситистэ.
Бу куонкурус Арассыыйа литератураларын сайыннарар, национальнай литературалары киэҥ эйгэҕэ таһаарар сыалтан тэриллибитэ. Куонкуруска абазин, коми, осетин, татаар, коми-пермяцкай, табасаран, авар, бурят, немец, белорус, эрзян, кумык, чуваш, башкир, саха, о.д.а. тыллартан тылбаастанан араас үлэ киирбит. Дьүүллүүр сүбэ хоһооннорго, оҕо литературатыгар уонна прозаҕа тус-туһунан миэстэлэри олохтоото.
Прозаҕа идэтийбит уус-уран тылбаасчыт Альбина Борисова саха народнай суруйааччыта Василий Васильев–Харысхал “Таптал түөрт муннуга” диэн айымньытын тылбаастаан бастакы миэстэни ылла. Альбина Андриановна М.Горькай аатынан Литература институтун үөрэнэн бүтэрбитэ. Өксөкүлээх Өлөксөй, Платон Ойуунускай айымньыларын киэҥ эйгэҕэ таһаарбыт уус-уран тылбаасчыт буолар.
Аграфена КУЗЬМИНА