Бүгүн, ыам ыйын 16 күнүгэр, Саха сирин баһылыга Айсен Николаев Тыл сайдыытын сэбиэтин бастакы мунньаҕын ыытта. Кини сэбиэт биир сүрүн соругунан өрөспүүбүлүкэҕэ олорор норуоттар тылларын сайдыытыгар быһаарыныылары ылыныы диэн этэр.
Айсен Николаев норуоттар тылларын литэрэтиирэҕэ, искусствоҕа, медиа-, кибер-эйгэҕэ, дьиэҕэ-уокка сыыһырдыбакка, харыстаан туттуохха диэн бэлиэтиир. «Уопсастыбаҕа тыллары билэр, үөрэтэр мотивация уонна интэриэс баар буолуохтаах. Ол иһин, Сэбиэт үлэтигэр наука, үөрэх, култуура, айар сойуустар, уопсастыбаннай холбоһуктар бэрэстэбиитэллэрэ ыҥырылыннылар. Мин тыл бэлиитикэтигэр араас эйгэ барыта кыттыһара үтүө түмүктээх үлэни аҕалыаҕа диэн эрэнэбин», — диир Ил Дархан.
Сэбиэт бу сыллааҕы былаана түөрт түһүмэхтэн уонна 43 пуунтан турар. Манна официальнай докумуоннарга уонна иһитиннэрэр, биллэрэр эйгэҕэ таба суруйуу быраабылатын тутуһуу, онно анаан араас методическай матырыйаалы бэлэмнээһин, биир кэлим эксээмэн түмүктэрин ырытыы о.д.а. боппуруостар киирдилэр. Бу туһунан өрөспүүбүлүкэ бырабыыталыстыбатын бэрэссэдээтэлин солбуйааччы Ольга Балабкина иһитиннэрдэ.
Бэлиэтээн эттэххэ, 2019 сылы ХНТ төрүт норуоттарын тылларын сылынан биллэрбитэ.
edersaas.ru