Тыйаатырдар Роспотребнадзор ыйыытын, сүбэтин учуоттаан туран үлэлэрин саҕалыахтара.
Ахсынньыттан көрөөччүлэр сөбүлүүр испэктээктэрин, Саҥа дьыллааҕы туруоруулары көрүөхтэрин сөп. Ол гынан баран, быһаарыыны дириэктэрдэр ылыналлар диэн СӨ Култуура уонна духуобунай сайдыы министиэристибэтин пресс-сулууспата иһитиннэрэр.
Министиэристибэ, бастатан туран, Роспотребнадзор ирдэбиллэрэ төһө толоруллалларын бэрэбиэркэлээбит. Итиэннэ тыйаатырдарга таарыйбакка илиини дезинфекциялыыр тэрил туруоруллубутун, кыраадыһы мээрэйдиир тэриллэр баалларын, биирдэ кэтиллэр мааскаларынан, бэрчээккилэринэн хааччыммыттарын , билиэти хантаага суох атыылаһар табыгастаах ньыма киирбитин, социальнай дистанцияны көрдөрөр анал бэлиэлэр оҥоһуллубуттарын, рециркулятордар фойеҕа уонна саалаҕа баалларын бэлиэтииллэр.
Маны сэргэ, өссө туох тутуһуллуоътааҕый? Саала ирдэбил быһыытынан 50% туолуохтаах. Социальнай тэйиччи буолуу хайаатар да тутуһуллар. Хааччахтаныы эрэсиимигэр олоруохтаах дьон, хайаатар да ыраахтан олорон үлэлиэхтээхтэр. Бу дьиэлэригэр тымныйан ыалдьыбыт (ОРВИ) дьонноохтор, COVID-19 ыалдьыбыт киһини кытары хантаактаахтар, 65 -тэн уонна онтон аҕа саастаахтар, ону таһынан, дьарҕарбыт ыарыылаахтар. Испэктээги, кэнсиэри көрдөрүүгэ, үлэһиттэр ахсааннара эмиэ 50% -тан тахсыа суохтаах.
Күн бүгүн Нерюнгрига куукула тыйаатыра, эстрада тыйаатыра үлэлэрин саҕалаатылар. Ахсынньы 18 күнүгэр төрүт олохтоох аҕыйах ахсааннаах хотугу норуоттар тыйаатырдара, ахсынньы 24-26 күннэригэр П.А.Ойуунускай аатынан Саха академическай драматическай тыйаатыра, ахсынньы 25-26 күннэригэр А.С.Пушкин аатынан Нуучча драматическай тыйаатыра испэктээктэринэн көрөөччүлэрин үөрдүөхтэрэ.
+1
+1
+1
+1
+1
+1
+1