Тохсунньу 17-18 күннэригэр Владивосток куоракка Арассыыйаҕа Тыйаатыр сылын сүрүн бырайыагын – Театральнай марафону саҕалыыр бөдөҥ тэрээһиҥҥэ Уһук Илиҥҥи регион тыйаатырдара үксүлэрэ кыттыыны ыллылар.
edersaas.ru
Оттон марафон дойду устун ситиһиилээх айанын, Саха Өрөспүүбүлүкэтин Олоҥхо тыйаатырын кэлэктиибэ Алгыс сиэрин-туомун толорон, ситэрэн-хоторон биэрдэ диэн үөрүүлээх сонуну иһитиннэрбиппит.
Биллэн турар, бачча түмсэн баран айар кэлэктииптэр марафону саҕалааһынынан эрэ муҥурдамматахтара чахчы. Бырагыраама даҕаны сол курдук киэҥ уонна араас эбит.
Холобур, Саха сирин делегациятын салайааччы, СӨ култууратын уонна духуобунай сайдыытын миниистирэ Юрий Куприянов бастакы күн Уһук Илиҥҥи федеральнай уокурук култууратын миниистирин кытта оробуочай көрсүһүүтэ буолла.
Айар кэлэктииптэргэ анаан маастар-кылаастар тэрилиннилэр, “Театральнай маркетинг уонна менеджмент”, “Култуурунай нэһилиэстибэни араҥаччылааһын”, о.д.а. тиэмэлэргэ “төгүрүк остуолу” тула олорон санаа атастаһыылара, араас көрсүһүүлэр, презентациялар, куорат устун экскурсиялар ыытылыннылар.
Арассыыйа Театральнай деятеллэрин сойууһун бэрэссэдээтэлэ Александр Калягин регионнардааҕы СТД салайааччыларын кытта сүбэ мунньаҕар Саха сириттэн Айаал Аммосов, Үүнэр көлүөнэ тыйаатырын дириэктэрэ Алексей Павлов, А.Пушкин аатынан Нуучча академическай тыйаатырын дириэктэрэ-уус-уран салайааччыта Александр Лобанов, Нерюнгритээҕи куукула уонна актер тыйаатырын дириэктэрэ Петр Скрябин сырыттылар.
Өссө биир интэриэһинэй тэрээһининэн Уһук Илиҥҥи судаарыстыбаннай искусство институтун устудьуоннарын уонна преподавателлэрин кытта көрсүһүү буолла.
Ити курдук, Тыйаатыр сылын дьоһуннаах бырайыагын үөрүүлээхтик аһыы күннэрэ туһалаах көрсүһүүлэринэн баай-талым буоллулар.
Татьяна МАРКОВА, edersaas.ru