Бүгүн, тохсунньу 18 күнүгэр, киэһээ 19 чаастан дойдубут Илиҥҥи форпоһугар Владивосток куоракка Тыйаатыр сылын сүрүн бырайыага – Бүтүн Арассыыйатааҕы театральнай марафон саҕаланна.
edersaas.ru
Марафону үөрүүлээхтик аһыыга Саха Өрөспүүбүлүкэтин Олоҥхо тыйаатыра Алгыс сиэрин-туомун толордо.
Бу киэҥ далааһыннаах тэрээһиҥҥэ, Алгыс кэнниттэн, Мариинскай тыйаатыр Приморскайдааҕы сценатыгар, номоххо киирбит нуучча балета – П.Чайковскай «Спящая красавица» (Мариус Петипа классическай хореографията) көһүннэ.
Сүрүн бырайыагы аһыыга РФ бырабыыталыстыбатын вице-премьерэ, Тыйаатыр сылын тэрийэр кэмитиэт бэрэссэдээтэлэ Ольга Голодец, РФ култууратын миниистирэ Владимир Мединскэй, о.д.а. кыттыыны ылаллар.
Оттон биһиги өрөспүүбүлүкэбититтэн Владивостокка СӨ судаарыстыбаннай сүбэһитэ Андрей Борисов, култуура миниистирэ Юрий Куприянов, СТД бэрэссэдээтэлэ Айаал Аммосов, А.Пушкин аатынан Нуучча академическай тыйаатырын дириэктэрэ-уус-уран салайааччыта Александр Лобанов, Үүнэр көлүөнэ тыйаатырын дириэктэрэ Алексей Павлов, Куукула уонна актер тыйаатырын дириэктэрэ Петр Скрябин, Опера уонна балет тыйаатырын балетмейстера Екатерина Тайшина тиийдилэр.
Владивостоктан Калининградка диэри тыргыллар Театральнай марафон “күлүүһэ” Дьокуускайга эмиэ сылдьыаҕа. Ол курдук, биһиэхэ олунньу 14-16 күннэригэр аатырбыт чукотскай-эскимосскай судаарыстыбаннай «Эргырон» ырыа-үҥкүү ансаамбыла «Туундара мелодиялара» испэкээгин көрдөрүөҕэ.
Быйыл, Тыйаатыр сылыгар, Саха Өрөспүүбүлүкэтин тыйаатырдара элбэхтик гастроллуохтара.
Оттон театральнай марафоҥҥа уопсайа дойду 85 тыйаатыра кыттар.
Татьяна МАРКОВА.
Хаартыскалары Олоҥхо тыйаатыра ыытта.