«Тыгын Дархан» киинэ «Вече» киинэ бэстибээлин үс сүрүн бирииһин ылла.
Ол иһигэр, киинэ бэстибээлин бэрэсидьиэнин Светлана Дружинина бирииһин эмиэ ылла диэн СӨ Култуура уонна духуобунай сайдыы министиэристибэтин пресс-сулууспата үөрүүлээх сонуну иһитиннэрэр. Улуу Новгородка буолбут бэстибээл түмүктүүр дьоро киэһээтэ ахсынньы 7 күнүгэр ыытыллыбыт.
Бэстибээл бэрэсидьиэнин Светлана Дружинина бирииһэ, СӨ Бырабыыталыстыбатын өйөбүлүнэн уһуллубут Никита Аржаков «Тыгын Дархан» киинэтигэр бэрилиннэ. Маны сэргэ, «Бастыҥ актёр» анал аат кылаабынай оруолун толорбут Ньургун Бэчигэҥҥэ, «Лучшая операторская работа» наҕараада оператор Юрий Бережневка туттарылынна.
Пандемиянан сибээстээн онлайн уонна офлайн форматынан ыытыллыбыт бэстибээл түмүгэр, киинэни биэс тыһыынча кэриҥэ киһи көрбүтүн иһитиннэрбиттэр. Оттон киинэ Новгород уобалаһыгар 16 киинэ саалатыгар көрдөрүллүбүт.