«Норуот куукулата» норуоттар икки ардыларынааҕы бэстибээл иитинэн, Москваҕа «Гостиный Двор» быыстапка саалатыгар «Тыгын Дархан» куукулалар композицияларын дьоҥҥо-сэргэҕэ көрдөрдүлэр. Экспозиция СӨ норуодунай суруйааччыта Василий Яковлев-Далан «Тыгын Дархан» арамааныгар олоҕуран оҥоһуллубут.
Бу туһунан РФ Бэрэсидьиэнигэр СӨ Бастайааннай бэрэстэбиитэлистибэтин пресс-сулууспата иһитиннэрдэ. Быыстапкаҕа «Симэх» киинтэн сэттэ маастар тиийбиттэр. Уран тарбахтаах Надежда Пахомова: «Үөрүүлээх бырааһынньыкка кыттыы сомоҕолуулаахпытын көрдөрөр», — диэбит, маннык тэрээһиҥҥэ кыттыы Саха сирин маастардарын ааттарын-суолларын үрдэтэрин бэлиэтээбит.
Тэрээһиҥҥэ норуот култууратын сайыннарыыга, үгэһи харыстааһыҥҥа «Симэх» уус-уран оҥоһуктар уонна норуот ускуустубатын национальнай киин кылаатын бэлиэтээн туран, Москваҕа СӨ Бастайааннай бэрэстэбиитэлэ Андрей Федотов махтал суруга туттарыллыбыт.
Улахан тэрээһин түһүлгэтигэр 1000-тан тахса маастар кыттыбыт. Манна Сэбиэскэй кэмнээҕи, киэргэлгэ ууруллар, тыйаатыр, мульткиинэ куукулалара, тус кэллиэксийэттэн антикварнай куукулалар туруоруллубуттар.
