Балаҕан ыйын үһүс баскыһыанньатыгар Ойуур хаһаайыстыбатын үлэһиттэрин күнэ бэлиэтэнэр. Быйыл бу бырааһынньык балаҕан ыйын 19 күнүгэр бэлиэтэнэр. Бэлиэ күнү көрсө ойуур хаһаайыстыбатын үлэһиттэрин, бэтэрээннэрин Ил Дархан Айсен Николаев эҕэрдэлээтэ уонна наҕараадалаата. Айсен Николаев бу идэҕэ олохторун анаабыт дьону “туспа миссияны толорор, олорор планетабыт “күөх тыҥаларын” араҥаччылыыр дьон буолаҕыт” диэн бэлиэтээн эттэ.
Саха сиригэр күн бүгүн ойуур хаһаайыстыбатыгар 1 252 киһи үлэлиир – лесниктэр, иниспиэктэрдэр, маастардар «Авиалесоохрана» уонна «Якутлесресурс» салааларыгар үлэлииллэр. Бу иэдээннээх сайын устата ойуур баһаарын утары 25 тыһыынча кэриҥэ киһи бииргэ сомоҕолоһон кииристэ.
Эрэгийиэннэргэ ойуур харыстабылын үбүлээһини икки төгүл улаатыннарар туһунан Арассыыйа Бэрэсидьиэнэ Владимир Путин бэйэтинэн эттэ. Арассыыйа Бырабыыталыстыбатын быһаарыытынан, өрөспүүбүлүкэҕэ материальнай-тиэхэньиичэскэй баазаны бөҕөргөтүү бара турар: бу күннэргэ эрэгийиэҥҥэ 20 ыарахан уйуктаах тиэхиньикэ аҕалылынна, Уһук Илиннээҕи бырагырааманан өссө 23 тиэхиньикэ атыылаһыллыаҕа. «Ойууру харыстааһын» федеральнай бырайыак иһинэн ойууру баһаарынай тиэхиньикэнэн уонна тэриллэринэн хааччыйыы сыллата ыытыллыаҕа.
Норуот хаһаайыстыбатын үтүөлээх үлэһитэ, өрөспүүбүлүкэ ойуурун хаһаайыстыбатын бэтэрээнэ Вячеслав Олесов бэйэтин этиитигэр Саха сиригэр быйыл ураты суостаах уонна кураан күн-дьыл туран, хаһан да буолбатах айылҕа баһаардара уустук быһыыны-майгыны үөскэппитэрин туһунан эттэ. Онуоха өрөспүүбүлүкэ салалтата уонна баһылык Айсен Сергеевич Николаев тус бэйэтэ суһал уонна саталлаах туттунууларын түмүгэр, Арассыыйа Бэрэсидьиэнэ уонна Бырабыыталыстыбата, экология министиэристибэтэ, оборуона министиэристибэтэ, ЫБММ күүстэрэ, Рослесхоз сүүнэ улахан көмөнү оҥордулар.
— Быйыл тайҕаны быыһааһын дьыалатын тула дьон сомоҕолосто. Тус бэйэм биһиги Ил Дархаммыт саамай ыарахан турук үөскээбит сирдэригэр тиийэн үлэлиириттэн олуһун санаам көтөҕүллүбүтэ, – диир Вячеслав Олесов.
Үөрүүлээх тэрээһин кэмигэр Саха сирин баһылыга Айсен Николаев уонна айылҕа харыстабылын миниистирэ Сахамин Афанасьев бастыҥ үлэһиттэргэ судаарыстыба уонна биэдэмэстибэ наҕараадаларын туттардылар.
«Саха сирэ» хаһыат, edersaas.ru
Хаартыска sakha.gov.ru