Игорь Егоров саха эстрадатыгар «Секс-символ» быһыытынан биллэр биир чаҕылхай сулус буолар. Игорь айаҥҥа сылдьар буолан, биһиги итии чэй иһэ олорон кыайан сэһэргэспэтибит. Онон төлөпүөн ситимин нөҥүө аһаҕастык кэпсэттибит. Игорь киэҥ эйгэҕэ ырыаһыт эрэ быһыытынан буолбакка, кыраҕы харахтаах ытааччы быһыытынан спортинг эйгэтигэр биллэр. Онон бастакы ыйытыым бу икки эйгэ туһунан буолла.
- Ырыаһыт киһи хайдах спортсмен буолан хаалбыккыный?
- Спордунан оскуола эрдэхпиттэн дьарыктанабын. Ол курдук, тустуунан, волейболунан үлүһүйэр этим. Онон спортинг эйгэтигэр кэлиим соһуччу буолбатах. Оҕо эрдэхпиттэн бултуурбун, саанан ытарбын сөбүлүүбүн.
- Эйигиттэн дьон куруук куһу табарыҥ буолуо диэн ыйыталлар үһү. Чахчы табааччыгын дуо?
- Куһу табааһын сыал ытыыта буолбатах. Кустааһын диэн булт көрүҥэ. Булду Байанай биэрдэҕинэ биэрэр, биэрбэтэҕинэ биэрбэт. Куска сатабыллаах, толкуйдаах, этэргэ дылы кустуу үөрүйэх киһи сылдьар. Кус кэлиитэ, дугдалана сытар уугар кэлэн түһүүтэ эмиэ улахан оруоллаах. Барытын сыыспакка ытан ылабын диэн этэр кыаҕым суох. Киһи сиэринэн бултаан-алтаан сылдьабын.
- «Ньурба кыыһа» ырыаҕын истэ улааппытым. Хайдах, кимиэхэ анаан суруйбуккунуй?
- «Ньурба кыыһа» ырыатылын уонна матыыбын Владимир Васильев диэн киһи суруйбута. Биллэн турар, ханнык эрэ кыыска анаабыта буолуо. Оттон мин бу ырыаны Ньурбам кыргыттарыгар анаан ыллаабытым.
- «Тыа уолчаана» диэн ырыан биир кэм хит буола сылдьыбыта. Бэйэҕин тыа уолабын дэнэҕин дуо?
- Хас биирдии киһи тыа сириттэн силистээх. Мин куоракка олохсуйбутум төһө даҕаны 16 сыл буоллар, бэйэбин тыа киһитин курдук сананабын.
- Эйигин оҕолоох дииллэр. «Секс-символ» буола сылдьан, оҕолооххун кэпсээтэххинэ эмискэ сүгүрүйээччилэрин сүтэн хаалыахтара диэн кистээбитиҥ дуо?
- Бастатан туран, мин бэйэбин хаһан даҕаны секс-символ курдук санамматаҕым, ааттамматаҕым. Иккиһинэн, оҕолоохпун кэпсээн, айдааран оҕобор үчүгэйи, куһаҕаны, дьон тылын иҥэриэхпин баҕарбатаҕым. Хаһан баҕарар оҕону харыстыахха наада. Оҕом балтараа саастааҕар эфиргэ таһаара сылдьан бар дьоҥҥо билиһиннэрэн турардаахпын. Кыыһым билигин сааһа 11-э. Оҕобун оннук кичэллээхтик кистээбитим даҕаны диир кыаҕым суох.
- Оҕоҥ ийэтин кытта ыал буола сылдьыбытыҥ дуо?
- Оҕом ийэтин кытта аҕыс сыл бииргэ саахсаламмакка олорбуппут. Билигин оҕобун кытта ыкса билсэбин, көмөлөһөбүн. Оҕом ийэтин да кытта доҕордуу сыһыаннаахпыт.
- Инникитин биир эмит кыыһы кэргэн ылан дьиэ кэргэн тэриниэм дии саныыгын дуо?
- Саха киһитэ буоларым быһыытынан, аналбын көрүстэхпинэ, ыал буолуо дии саныыбын. Мин билигин сааһым 35-м. Эр киһи быһыытынан өйүм-санаам дьэ ситэн-хотон, дьиэ кэргэн тэринэн аҕа баһылык буоларга бэлэммин. Кэргэн ыллым да дьиэ туттан, мас олордон, оҕолонон-урууланан олоруом этэ. Арыый эдэр сылдьан ыал буолуохпун өй-санаа өттүнэн бэлэмэ суоҕум эбитэ буолуо. Биир кэм гастроллар, кэнсиэртэр түптээх олоҕу киһиэхэ биэрбэттэр.
- Билигин истээччилэргэр анаан ханнык ырыаны бэлэмнии сылдьаҕын?
- Билигин Ньурба вальса» диэн ырыаны уонна Никииппэр Сэмэнэп «Күннэтэ күүтэбин» диэн ырыатын оҥоро сылдьабын.
Олоҕун кэрчиктэрэ
1980 сыллаахха Ньурба улууһугар төрөөбүтэ.
1987 сыллаахха оскуолаҕа киирбитэ.
1997 сыллаахха оскуоланы бүтэрбитэ.
2001 сыллаахха музыкальнай училищены бүтэрбитэ.
2004 сыллаахтан «Спортинг» спорт көрүҥүнэн дьарыктанар.
Сэмсэ тыл
Юрий Борисов, Байанай сурунаалы тэрийэн таһаарааччы:
— Мин Игорь Егоровтыын улаханнык алтыспатах киһим диэххэ сөп. Ол эрэн хаста даҕаны Дьокуускайга, Орто Халымаҕа бииргэ бултуу сылдьыбыппыт. Саха киһитэ дьиҥ бэйэтэ булка сылдьан арыллар эбит. Игорь олус байанайдаах, азартах булчут. Олус үчүгэйдик ытар. Куһаҕан суоллаах сиринэн УАЗ массыынатынан илдьэ сылдьыбыта. Биир тылынан эттэххэ, Игорь – айылҕа оҕото.
Ульяна ЗАХАРОВА.