Тыа сирин ыччатын тутуу үлэтигэр такайыахтара.
Маныаха Манчаары оонньуулара ыытыллыахтаах Горнай улууһа бастакы пилотнай оройуонунан талылынна. «Улахан тэрээһиҥҥэ бэлэмнэнэн, улууска тутуу үлэлэрэ ыытыллыахтара. Онно үөрэнэн идэ ылбыттары кытыннарыахтара«, — диэн бырайыак инициатора, СӨ Ыччат бырабыыталыстыбатын чилиэнэ Марина Сидорова этэр.
«Үөрэх тэрилтэтигэр эрэ үөрэнэн оробуочай идэни ылар курдук санааһын баар. Ол гынан баран, тыа сирин олохтоохторо улуустарыттан ырааппакка эрэ үөрэнэллэригэр усулуобуйа тэриллэр, улууска тиийэн үөрэтиэхтэрэ (передвижной учебно-строительный комбинат)«, — диэн СӨ Үөрэх уонна наука миниистирэ Михаил Сивцев этэр. Теорияҕа «Идэни урутаан бэлэмниир киин» кэммиэрчэскэйэ суох автономнай тэрилтэ платформатыгар тэйиччиттэн олорон үөрэнэллэр.
Киин дириэктэрэ Владислав Хабаров: «Ыччаттар ылбыт билиилэрин чочуйуохтара, сатабылларын көрдөрүөхтэрэ, квалификационнай эксээмэннэри туттарыахтара. Ол түмүгүнэн оробуочай идэҕэ үөрэммиттэрин туһунан докумуоннары тутуохтара. Үөрэх олунньуттан саҕаланара былааннанар«, — диэтэ.
«Горнай улууһун дьаһалтатын хамаандата бырайыагы олоххо киллэрэргэ көхтөөхтүк ылыста. Атын улуустар сэргээтэхтэринэ, бырайыак географиятын кэҥэтиэхпитин сөп. Бырайыак үөрэтэри сэргэ, оҕолорго, эдэр ыччакка идэлэрин талалларыгар эмиэ көмөлөһөр соруктаах. Өрөспүүбүлүкэбитигэр тутуу үлэтигэр идэлээх элбэх ыччат баар буолуон, тутуу хампаанньалара үлэ миэстэтин тэрийиэхтэрин баҕарабыт«, — диэтэ СӨ Ыччат бырабыыталыстыбатын бэрэссэдээтэлэ Василина Лукина.
СӨ нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Степан Москвитин кылаабынайа билиини, сатабылы, үөрүйэҕи иҥэрэр наадатын, ол туһуттан үөрэтии хаачыстыбата үрдүк буолуохтааҕын бэлиэтээтэ.
СӨ Тутуу миниистирин солбуйааччы Евгений Афанасьев хамаандаҕа ситиһиилэри баҕарда. Пандемияттан сылтаан, ааспыт сылга тутуу үлэтигэр үлэһит илиинэн хааччыллыы боппуруоһугар уустуктар үөскээбиттэрин эттэ. Үөрэх уонна наука министиэристибэтин, Дьарыктаах буолуу кэмитиэтин кытта көмөлөөн тутуу салаатыгар олохтоох каадырдары тардыыга улахан үлэ ыытыллыбытын, бу хайысхаҕа үлэ салҕанарын эттэ.
«Пуск» бырайыагы олоххо киллэрэргэ бииргэ үлэлииргэ тохсунньу 28 күнүгэр алта өрүттээх Сөбүлэһии түһэрсилиннэ. Дьоһун суолталаах тэрээһиҥҥэ СӨ Үөрэх уонна наука миниистирэ Михаил Сивцев, нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Степан Москвитин, СӨ Тутуу миниистирин солбуйааччы Евгений Афанасьев, Горнай улууһун баһылыга Никита Андреев, СӨ Ыччат бырабыыталыстыбатын бэрэссэдээтэлэ Василина Лукина, «Идэни урутаан бэлэмниир киин» дириэктэрэ Владислав Хабаров кытыннылар.