Горнай улууһун Бэс Күөлүн олохтоохторо Диана, Леонид Федоровтар оҕолорунаан быйыл, Кыайыы 75 сылынан, тыыл бэтэрээнигэр улуус хаһыатын сурутан бэлэхтээтилэр.
edersaas.ru
Кыайыы күнүн иллээх ыал быйыл хайдах көрсүбүтүн, туох тэрээһиҥҥэ кыттыбытын төлөпүөнүнэн ыйыталастыбыт.
—Тыа сирин элбэх оҕолоох ыала бырааһынньыктары өрүү өрө көтөҕүллүүлээхтик ыларга кыһаллабыт. Коронавирус дьаҥын бохсон, дьиэҕэ түмсэн олорор дьон, тиэргэн эрэ иһинэн да буоллар, күүтүүлээх күндү күммүтүн — Кыайыы күнүн, сэргэхтик көрүстүбүт.
Дьиэ иһин-таһын киэргэтии сүрүннээн оҕолорго сүктэрилиннэ. Үгэс курдук, эрдэттэн ырыа, хоһоон үөрэтэн бэлэмнэммиттэрэ. Кыра уолаттар: Уйбаанчык, Чаҕыл, Валера «Мир без войны» ырыаны ыллааннар, ону убайдара видеоҕа уһулан бараннар, Кыайыы күнүгэр аймахтарын эҕэрдэлээн ыыппыттара. Сайааннаах Эрхаан бырааттарын салайан, бырааһынньыгы көрсө эрдэттэн уруһуйдары бэлэмнээбиттэрэ.
Сардааналаах Айаана дьиэни, тиэргэни киэргэтиини сэргэ, миэхэ көмөлөһөн, ас-үөл бэлэмниир, остуол киэргэтэр түбүгэр түһэллэр. Ону сэргэ, сонун, саҥа бүлүүдэни толкуйдууллар, оонньуу тэрийэллэр. Сиэммит Ангелина убайдара, эдьиийдэрэ ыллаатахтарына, үҥкүүлээн үөрдэр. Кыайыы күнүгэр үҥкүүнү кыайа-хото тутта.
Оҕолорбут Кыайыы күнүнэн сынньалаҥ киинэ тэрийбит аахсыйатыгар наһаа үөрэн, долгуйан, кыһаллан туран кыттыстылар, нэһилиэк кырдьаҕастарын эҕэрдэлээн хоһооннорун доргуччу аахтылар. Ол видеонан тарҕаммыта наһаа үчүгэй. Нэһилиэк кырдьаҕастара эҕэрдэ тутаннар сэргэхсийии, үөрүү бөҕө буоллулар.
Биһиги оҕолорбутугар Аҕа дойду уоттаах сэриитигэр сылдьыбыт эһээлэрин, сэрии ыар, сут сылларыгар сарсыардаттан киэһээ хойукка диэри, сырдыгы-хараҥаны ыпсаран үлэлээбит эбээлэрин, аймахтарбыт тустарынан өрүү кэпсиибит. Оҕолор ону наһаа сэргээн, сэҥээрэн истэллэр. Дьоннорун уруһуйдарыгар хоһуйарга кыһаллаллар.
Быйыл Улуу Кыайыы 75 сылынан тыыл бэтэрээнигэр Варвара Егоровна Сухановаҕа улууспут хаһыатын сыл аҥаардааҕы сурутуутун дьиэ кэргэммит аатыттан бэлэхтээтибит. Бу үгэһи салгыыр былааннаахпыт. Онуоха оҕолорбут биһиги холобурбутун көрө сылдьаннар, кэлин бэйэлэрэ улаатан, ыал буолан бараннар, ытык кырдьаҕастарга бу курдук хаһыат сурутан бэлэхтиир буолуохтара диэн эрэнэбит, — диэтилэр иллээх ыал ийэлээх аҕалара Диана Степановна уонна Леонид Иванович.
Сардаана Баснаева, «Саха сирэ» хаһыат, edersaas.ru
Федоровтар дьиэ кэргэн хаартыскалара.