Тыа сирин территорияларын тупсарыыга федерация уонна өрөспүүбүлүкэ бүддьүөттэриттэн харчы көрүллүөҕэ

Бырабыыталыстыба Бэрэссэдээтэлэ Андрей Тарасенко 2021 сылга тыа сирин территорияларын тупсарыыга өрөспүүбүлүкэ бүддьүөтүттэн олохтоох бүддьүөттэргэ субсидия көрөр туһунан уураахха илии баттаата.

Бу докумуон быһыытынан, тыа сирин территорияларын тупсарыыга 40,6 мөл солк., ол иһигэр 40,2 мөл солк федеральнай бүддьүөттэн көрүллүбүт. Айсен Николаев бигэргэппит «2020-2025 сс. тыа сирин территорияларын кэлим сайыннарыы» судаарыстыбаннай бырагырааматын чэрчитинэн күн бүгүн 13 улууска 30 эбийиэк тутуллар. Бу иһигэр бааллар: сынньалаҥ зоналара, оҕо оонньуур былаһааккалара, доруобуйаларынан хааччахтаах дьоҥҥо адаптивнай спорт былаһааккалара, уулуссалары тупсарыы, ардах уута сүүрэр сирин оҥоруу, олбуор тутуута.

Тыа хаһаайыстыбатын министиэристибэтин чахчытынан, икки тутуу олоххо киллэриллибит: Үөһээ Бүлүү улууһун Тамалакаан нэһилиэгэр таһырдьатааҕы тренажердар уонна Чурапчы улууһун Болугур нэһилиэгэр Социалистическай Үлэ Дьоруойа Р.И.Констинтинов аатынан искибиэр. Бу туһунан Ил Дархан уонна Бырабыыталыстыба пресс-киинэ иһитиннэрэр. 

Раиса Сибирякова, «Саха сирэ» хаһыат, edersaas.ru