СӨ бырабыыталыстыбатын бэрэссэдээтэлэ Андрей Тарасенко РФ тыатын хаһаайыстыбатын миниистирин солбуйааччы Оксана Луту кытары көрсөн, тыа сирин биир кэлим сайдыытын бырагыраамматын туһунан кэпсэттэ.
Андрей Тарасенко бу бырагыраама Саха сирин тыатын сирин сайыннарыыга улахан оруолу ыларын, 2021 сылга манна анаан 1,9 млрд солкуобай көрүллүбүтүн, ол иһигэр федеральнай бүддьүөттэн 1,8 млрд солкуобай кэлбитин бэлиэтээтэ. “Быйыл олорор дьиэ тутуутугар тыа сиригэр 20 ыал анал субсидияны ылла. Намҥа, Мэҥэ Хаҥаласка дуогабарынан эдэр исписэлиистэр олорор дьиэлэрэ тутулла турар. Чурапчы улууһугар “Сайдыы” диэн саҥа түөлбэ тутуллан эрэр. Бу курдук кыбартаал Намҥа эмиэ олоххо киириэхтээх”, – диэн иһитиннэрэр премьер-миниистир.
“Тыа сирин саҥа көстүүтэ” диэн бырайыагынан өрөспүүбүлүкэҕэ барыта 15 эбийиэк ккириэхтээх. Билигин бу эбийиэктэртэн Бүлүү улууһун Үгүлээтигэр тутулла турар оскуола былааныттан хаалар кутталлаах. Бу бырайыакка эһиил 2022 сылга тыа сирин сайыннарыыга барыта 1,2 млрд солкуобайы көрөргө былаанныылар.
Аграфена КУЗЬМИНА