«Тыа сирин кэлимник сайыннарыы» судаарыстыбаннай бырагыраама туһунан кэпсэтии таҕыста
2020-2025 сылга тыа сирин кэлимник сайыннарыы бырагыраамата олоххо киириитин туһунан Ил Дархан Айсен Николаев салайыытынан ыытыллыбыт мунньахха дьүүллэстилэр.
edersaas.ru
СӨ Ил Дархана Айсен Николаев мунньах арыллыытыгар бу бырагыраама өрөспүүбүлүкэҕэ улахан суолталааҕын бэлиэтээн эттэ:
—Бырагыраамма көмөтүнэн тыа сиригэр социальнай эбийиэктэр, олорор дьиэлэр тутуллаллар, гаастааһын уонна иһэр уунан хааччыйыы боппуруостара быһаарыллаллар.
2020 сылга бырагыраама нөҥүө уопсайа 1 миллиард 730 мөлүйүөн суумалаах сөбүлэҥнэр оҥоһулуннулар. Онтон 1 миллиард 448 мөлүйүөн солкуобай – федеральнай, 120 мөлүйүөн өрөспүүбүлүкэ уонна 78 мөлүйүөн солкуобай олохтоох бүддьүөттэн итиэннэ солкуобай 83 мөлүйүөн солкуобай бүддьүөт таһынааҕы харчыттан тыырылынна.
СӨ Тыатын хаһаайыстыбатын миниистирэ Александр Атласов иһитиннэрбитинэн, бырагыраама 10 салаанан оҥоһулла сылдьар. Ол иһигэр, “Тыа сиригэр олорор дьиэни тутталларыгар (атыылаһалларыгар) социальнай төлөбүр” салааҕа 69 мөлүйүөн солкуобай көрүлүннэ, 51 кубуота түҥэтилиннэ.
Холобура, Үөһээ Бүлүү улууһун Балаҕаннаах сэлиэнньэтигэр уонна Хаҥалас Тиит Эбэтигэр эдэр үлэһиттэргэ диэн түөрт кыбартыыралаах олорор дьиэ тутуллар. Нам улууһун Таастаах нэһилиэгэр эмиэ дьиэ тутулла турар.
Маны таһынан, судаарыстыбаннай бырагыраама чэрчитинэн тыа хаһаайыстыбатын үлэһиттэрэ үөрэнэллэр, устудьуоннар тыа хаһаайыстыбатын тэрилтэлэригэр быраактыкаларын ааһаллар.
Өрөспүүбүлүкэ 21 улууһугар уопсастыбаҕа туһалаах 113 эбийиэк тутуллара былааннанар. Бу сыл алтынньы ыйыгар Өлөөн улууһун Дьилиҥдэ сэлиэнньэтигэр 50 миэстэлээх оҕо уһуйаана үлэҕэ киириэхтээх.
Ил Дархан бырагырааммаҕа кыттыан баҕалаах бырайыактары үчүгэйдик сыымайдаан таллаларыгар эттэ:
— Олоххо киирэр бырайыактар тыа дьонун кыһалҕаларын быһаарар сүрүн сыаллаах буолуохтаахтар. Өрөспүүбүлүкэ «Тыа сирин кэлимник сайыннарыы» федеральнай бырагыраамаҕа кыттан, улуустар олохторун-дьаһахтарын биллэрдик тупсарда – диэн Ил Дархан мунньаҕы түмүктээтэ.
СӨ Ил Дарханын уонна Бырабыыталыстыбатын пресс-сулууспата