Тыа сирин олохтоохторо — араадьыйа диктордара

Ааптар: 
Бөлөххө киир:

Бүлүү улууһун Дьөккөн нэһилиэгин уопсастыбаннаһа тэрийиитинэн өрөспүүбүлүкэтээҕи диктордар күрэстэрэ буолан ааста.

edersaas.ru

От ыйын 12 күнүгэр Сэбиэскэй Сойуус Дьоруойа, Саха араадьы­йатын биллиилээх диктора Николай Кондаков төрөөбүтэ 100 сылын туолла. Дьөккөннөр биир дойдулаахтара, араадьыйа суруналыыһа Николай Алексеевич Кондаков төрөөбүтэ 100 үбүлүөйдээх сылыгар, Улуу Кыайыы 75 сылыгар, Ийэ дойдуга бэриниилээх буолуу сылыгар уонна Саха араадьыйата төрүттэммитэ 90 сыллаах үбүлүөйүгэр анаан бэс ыйын 11 күнүттэн саҕалаан от ыйын 5 күнүгэр диэри өрөспүүбүлүкэтээҕи “Мин – араадьыйа дикторабын» диэн онлайн-куонкуруһу тэрийэн ыыттылар.

Дьүүллүүр сүбэ

Күрэс дьүүллүүр сүбэтигэр Дьөккөн нэһилиэгин баһылыгын солбуйааччы Акулина Данилова, РФ үөрэҕириитин туйгуна, СӨ тыа хаһаайыстыбатын үтүөлээх үлэһитэ, «Гражданскай килбиэн» бэлиэ хаһаайката, «Ыллыкчаан» оҕо уһуйаанын сэбиэдиссэйэ Альбина Ионова, Сэбиэскэй Сойуус Дьоруойа Николай Кондаков аатынан Дьөккөн орто оскуолатын иитии үлэтигэр дириэктэри солбуйааччы, СӨ үөрэҕириитин туйгуна Валентина Жирохова, «Сарыал» култуура киинин исписэлииһэ Марианна Пестрякова үлэлээтилэр.

Диктор куонкуруһугар 25 улахан киһи уонна 4 оҕо кыттыыны ыллылар. Күөн күрэскэ өрөспүүбүлүкэ араас муннуктарыттан бэрт көхтөөхтүк кытыннылар. Ол курдук, улахан дьоҥҥо – Мииринэй, Сунтаар, Ньурба, Үөһээ Бүлүү, Ленскэй, Кэбээйи, Эдьигээн, Нам, Чурапчы, Амма, Таатта, Уус Алдан, Мэҥэ Хаҥалас, Аллараа Бэстээх, Хаҥалас, Дьокуускай куорат, Тулагы, Горнай, Өлүөхүмэ, Дьааҥы, Томпо, Өймөкөөн, Үөһээ Халыма, Абый улуустарыттан, бэл, Новосибирскай куораттан кыттыыны ыллылар. Бүлүү улууһуттан Бүлүү куората, Тааһаҕар, Чинэкэ, Өкүндү, Дьөккөн нэһилиэктэрин олохтоохторо кытыннылар. Онтон оҕолорго – Үөһээ Бүлүү, Мэҥэ Хаҥалас, Томпо, Нам, Кэбээйи, Эдьигээн улуустарыттан көхтөөх кыттыыны ыллылар.

Бастакы холонуута – бастакы миэстэ

«Мин – дикторбын» күрэс кыайыылаахтарын кытта төлөпүөнүнэн кэпсэттим.

Саргылаана Иванова Кэбээйи Мукучутугар саха төрүт көрүҥнэрин эрчийэр оҕо спортивнай ос­­куолатыгар методистыыр.

Абый улууһун Абый нэһи­лиэгиттэн төрүттээхпин. Кэргэним Михаил Иванов хапсаҕайга СӨ үтүөлээх тренерэ.  Кини дойдутугар Мукучуга олохсуйбуппут 22 сыл буолла. Биирдэ эмэ тэрилтэм тэрээһиннэригэр конферансьелааччыбын. Саха араадьы­йатын истэрбин олус сөбүлүүбүн. Диктордар биэриилэрин истэн холонуохпун баҕарааччыбын. Дьиэҕэ олорор кэммэр биир батсаап бөлөххө балаһыанньа кэлбитигэр, кыттар баҕа санаа көтөн түспүтэ.  Тута олохтоох бибилэ­тиэкэр, нэһилиэк сонуннарын киэн араҥаҕа араадьыйа, хаһыат нөҥүө тиһигин быспакка сырдатааччы Ксения Новикова бэлэмнээн оҥорбут матырыйаалын ылан, бэйэм ааҕарбар барсар гына көннөрөн, ааҕан холонон көрбүтүм. Онтон «барсыыһы» дии санаан, муусукатын таҥмытым. Маны барытын бэйэм, быһа холоон эрчиллэ таарыйа, аан бастаан оҥорбутум. Түгэнинэн туһанан, киэҥ билиилээх дьүөгэбэр истиҥ махталбын тиэрдэбин.

Куонкуруска бастакы кыттыым, онон күннээҕи түбүктэн аралдьыйан, бэйэбин атын өттүнэн арыйарбар «күөх уот» умайда, – диэн сэһэргэһээччим сулустаах чааһыттан санаатын үллэһиннэ.

Талааннаах дьону көҕүлүүр күрэс

Ньурба Антоновкатын олохтооҕо Михаил Софронов эмиэ 1-кы миэстэлээх кыайыылаах.

Орто оскуоланы бүтэриэхпиттэн тыа сирин араас үлэтигэр үлэлээтим. Суоппартан саҕалаан, хачыгаарыгар тиийэ. Билигин Ньурбатааҕы Олох-дьаһах хомунаалынай хаһаайыстыбатын үлэһитэбин. Октябрьскай нэһилиэк бочуоттаах олохтооҕобун. ОДьКХ үлэтин бэтэрээнэбин. Түөрт оҕолоохпун. Олоҕум эрэллээх аргыһа үлэ бэтэрээнэ, 35-с сылын оҕо саадыгар үлэлиир.

Улууспар, нэһилиэкпэр ыытыллар ыһыахтарга, араас тэрээһиннэргэ диктордыыбын. Ол иһин уопуттаах киһи быһыытынан, бэ­­йэбин билиһиннэрдэрбин диэн баҕа санааттан кыттыбытым.

Бу күөн күрэс суолтата, мин тус санаабар, Сахабыт сирин араас улуустарыгар бүгэн олорор талааннаах киһи бэйэтин саҥарар дьоҕурун бар дьоҥҥо тиэрдии. Дьиэҥ иһигэр туох да бэлэмэ суох, ыллыҥ да саҥараат, тута устан ылан ыытар уустук. Ол иһин Ньурба култууратын дэпэртээмэнин үлэһиттэрин көмөлөһүннэрбитим.

Маннык күрэс, арааһа, өрөспүүбүлүкэҕэ бастакытын ыытылынна. Бүлүү улууһун Дьөккөнүн олохтоохторугар, биир дойдулаахтара, Сэбиэскэй Сойуус Дьоруойа Николай Кондаков 100 сылын бэртээхэй куонкуруһу тэрийэн, үтүө киһи аатын бүтүн Саха сиригэр ааттаппыттарыгар истиҥ махталбын тиэрдэбин. Маннык күрэс ыытыллара олус туһа­­лаах. Кэнэҕэс бу маннык күөн кү­­рэстэртэн саха бастыҥ диктордара үүнэн тахсыахтара турдаҕа, – диэн Михаил Софронов санаатын тиэртэ.

Кыайыылаахтар ааттара

Дьүүллүүр сүбэ «Мин – араадьыйа дикторабын» кү­­рэскэ кыайыылаахтары маннык араарда:

Оҕолорго Гран-при бириискэ 14 саастаах 8 кылаас үөрэнээччитэ Милена Андреева (Мэҥэ Хаҥалас улууһа, Майа с.) тигистэ.

  • 1-кы миэстэ – 6 саастаах кыттааччы Саргылана Шадрина (Эдьигээн улууһа);
  • 2-c миэстэ – 6 саастаах кыттааччы Сардаана Шадрина (Эдьигээн улууһа). Иккиэн ­эдьиийдии-балыстыы игирэ кыргыттар.
  • 3-с миэстэ – 9 саастаах 3 кылаас үөрэнээччитэ Леонтий Ноговицын (Үөһээ Бүлүү улууһа).

Улахан дьоҥҥо Гран-при бирииһинэн Бүлүү куоратыттан Сэбиэскэй Сойуус Дьоруойа Николай Степанов аатынан 3 №-дээх орто оскуолатын тыйаатыр ускуустубатын учуутала Василий Николаев наҕараадаланна.

  • 1-кы миэстэ – Оҕо спортивнай оскуолатын методиһа Саргылана Иванова (Кэбээйи улууһа, Мукучу нэһилиэгэ); Михаил Софронов – ОДьКХ оператора (Ньурба улууһа, Антоновка нэһилиэгэ); Наталья Захарова – Кыраһыабай буолуу салонун маастара (Дьокуускай куорат).
  • 2-c миэстэ – «Эйгэ» киин уус-уран салайааччыта Саргылана Ксенофонтова (Эдьигээн улууһа); учуутал Айталина Семенова (Бүлүү улууһа, Чинэкэ нэһилиэгэ); оҕо уһуйаанын иитээччитэ Анна Попова (Сунтаар улууһа).
  • 3-с миэстэ — Вера Местникова – менеджер, Ньургун Христофоров – «Тускул» кулууп дириэктэрэ (Чурапчы улууһа, Бахсы нэһилиэгэ); педагог-библиотекарь Зоя Боппосова (Таатта улууһа, Уолба нэһилиэгэ); учуутал Маргарита Сивцева – (Томпо улууһа, Байаҕантай нэһилиэгэ).

… Ити курдук, ыраах Бүлүү улууһун Дьөккөн нэһилиэгин олохтоохторо биир дойдулаахтарын аатын үйэтитиигэ бэртээхэй тэрээһини тэрийэн ыыттылар. Дьон күргүөмнээх кыттыытыттан да көрдөххө, бу маннык дьону түмэр куонкурустар олус наадалар эбит. Онон дьөккөннөр ­ырааҕыттан-чугаһыттан, үптэн-харчыттан тутулуга суох, баҕардахха, ханнык баҕарар тэрээһини ыытыахха сөп эбит диэн бэртээхэй холобуру көрдөрдүлэр. Кинилэр өрөспүүбүлүкэ дьонун-сэргэтин хамсатан, киэн туттар биир дойдулаахтарын, Сэбиэскэй Сойуус Дьоруойа Николай Кондаков аатын дорҕоонноохтук ааттаттылар.

Елена ПОТОЦКАЯ, «Cаха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0