Чурапчы оҕолоро мюзикл туруоран норуоттар икки ардыларынааҕы бэстибээлгэ миэстэлэстилэр
Аҕыйах хонуктааҕыта Чурапчытааҕы оҕо искусствотын оскуолатын фортепианоҕа кылааһын үөрэнээччилэрэ норуоттар икки ардыларынааҕы “Масочка” оҕолор II театральнай бириэмийэлэрин бэстибээлин финалыгар II-с истиэпэннээх лауреат аатын ылан кэллилэр.
edersaas.ru
Бу иннинэ, ыам ыйыгар Сеул (Корея) куоракка “Олох сибэккилэрэ” (“Цветы жизни”) норуоттар икки ардыларынааҕы бэстибээлгэ ситиһиилээхтик кыттан, Санкт-Петербург куоракка финалга кыттар бырааптаммыттара. Буолаары буолан — фортепиано кылааһын оҕолоро олоҥхонон мюзиклга! Аны муусукатын биир дойдулаахтара, Чурапчытааҕы оҕо искусствоҕа оскуолатыттан кынат анньынан тахсыбыт, билигин В.А.Босиков аатынан СӨ Муусука үрдүкү оскуолатыгар 10-с кылааска ситиһиилээхтик үөрэнэр, Арассыыйатааҕы эдэр композитордар сойуустарын чилиэнэ Никифор Яковлев суруйбут.
Бэстибээлгэ, уопсайа, 7 номинациянан 900 оҕо кыттыбыт. Бастатан туран, тыа сириттэн соҕотох Чурапчы кэлэктиибэ эрэ тиийбит. Иккиһинэн, фортепиано кылааһын оҕолоро норуоттар икки ардыларынааҕы театральнай куонкуруска миэстэлэһиилэрэ диэн сэдэх көстүү буолар. Салайааччы Светлана Макарова бэлиэтииринэн, супер-финалга кыттыбыт атын кэлэктииптэр үгүстэрэ оҕо көрдөрүүлээх (образцовай) театральнай ансаамбылларын иитиллээччилэрэ эбит. “Театральнай хайысхаҕа туох даҕаны сыһыана суох курдукпут эрээри, кинилэри кытта тэҥ таһымҥа тахсан, 2-с истиэпэннээх лауреат аатын ылбыппытыттан олус үөрдүм”, — диэн сонунун үллэстэр.
Тоҕо, туох сыалтан мюзикл туруорарга санаммыккыный диэн ыйытыыбар: “Үөрэппит оҕом Никифор Яковлев айбыт муусуката сыанаҕа туруоруллубутуттан салгыы сайыннын итиэннэ иитиллээччилэрим уопсай кэлэктиипкэ үлэлии, туохтан да толлубакка аһаҕастык тутта-хапта үөрэнэллэрин туһугар ылсыбытым”, — диэн Светлана Павловна хоруйдуур.
Манна даҕатан эттэххэ, Саха сиригэр оҕолор эпоска муусуканан мюзиклы туруоруулара диэн суоҕун кэриэтэ. Аны баара-суоҕа тоҕус оҕо ортотунан үстүү оруолу толорон, тоҕус мүнүүтэ иһигэр Мария Эверстова-Обутова “Үрүҥ үрүмэччи аттаах Бэргэн Бухатыыр” олоҥхотун мюзиклынан көрдөрөн, үс дойдуну үһүөннэрин арыйбыттар. Дьүүллүүр сүбэ чилиэннэринэн үгүстэрэ тыйаатыр диэйэтэллэрэ үлэлээбиттэр. Кинилэр саха оҕолоро олус имигэстэрин уонна ылбыт тэтимнэрин ыһыктыбаттарын чорботон бэлиэтээбиттэр.
Санкт-Петербурга тиийбиччэ, сүрүн бэстибээл кэнниттэн оҕолор үс күн сынньанаат, аны норуоттар икки ардыларынааҕы “Вдохновение” оҕолор бэстибээл-куонкурустарыгар кыттан, фортепианоҕа Саида Левина 2-с, Карина Баина 3 истиэпэннээх лауреат, Аня Шамаева 1 истиэпэннээх дипломант аатын сүкпүттэр. Ону таһынан “Бастыҥ көстүүм иһин” анал бирииһинэн наҕараадаламмыттар.
Онон, тыа сирин оҕолоро норуоттар икки ардыларынааҕы таһымҥа классическай муусуканы дьүөрэлээн мюзиклы туруоруохтарын сөп эбит диэн өйдөбүлү иҥэрбиттэр. Ити хайысхаҕа саҥа суолу тэлээччилэринэн буолбуттар.
Людмила ПОПОВА, “Саха сирэ”, edersaas.ru