Бүгүҥҥү куйаар ситиминэн ыытыллыбыт планеркаҕа Айсен Николаев “Олорор дьиэ уонна куорат эйгэтэ” диэн национальнай бырайыакка уонна тыа сирин кэлимник сайыннарыыга туһуламмыт судаарыстыбаннай бырагыраамаҕа сиһилии тохтоото.
«Тыа сирин кэлимник сайыннарыы» бырагыраамаҕа олоҕуран, бүгүҥҥү күҥҥэ 69 бырайыагы олоххо киллэрии бара турар.
— Бу бары бырагыраамалартан саамай дьон болҕомтотугар сылдьар бырайыактар. Онон бырабыыталыстыба инники тахсыбыт бары сыыһаны-халтыны учуоттаан, эрэгийиэн бу хайысхаҕа бары күүһүн уонна кыаҕын ууран туран үлэлиэн наада, — диэн бэлиэтээтэ Ил Дархан.
Былааннаахтык ыытыллар үлэ түмүгүнэн Саха сирэ инники күөҥҥэ сылдьарын РФ Бырабыыталыстыбатын вице-премьерэ Марат Хуснуллин таһымыгар буолбут мунньахха бэлиэтэммит.
Ил Дархан иһитиннэрбитинэн, бырабыыталыстыба хамыыһыйатын президиума Саха сирин түөрт нэһилиэгэр хочуолунайдары уонна ититэр ситимнэри тутууга сойуому биэрии бигэргэммит. Маны таһынан, Нерюнгри куорат ууну хачайдыыр ханаалын саҥардыы иккис уочаратын үлэтин бырайыага ОДьКХ-ны уларыта тутуу пуондатын көрүүтун ааспыт уонна билигин РФ Тутуу уонна ОДьКХ министиэристибэтин ырытыытыгар киирбит.
Елена ПОТОЦКАЯ, “Саха сирэ” хаһыат, edersaas.ru
Хаартыска — Мария Васильева, СИА.