Тыа сирин кэлимник сайыннарыы бырагырааматынан 13 саҥа эбийиэк тутуллуоҕа

Саха сирин бырабыыталыстыбатын бэрэссэдээтэлэ Андрей Тарсенко РФ Тыатын хаһаайыстыбатын миниистирин бастакы солбуйааччы Оксана Луты кытта көрүстэ.

Бу көрсүһүүгэ үүнүү, оҥорон таһаарыы уонна комбикорманы, түргэнник ситэр салаа, олохтоох хаһаайыстыбаларга тиэрдии туһунан кэпсэттилэр.

— Саха сиригэр тыа хаһаайыстыбатын сайыннарар бары салаа хайысхалара Ил Дархан Айсен Николаев ыйааҕар бааллар. Экэниэмикэ салаатыгар буолбут балаһыанньанан сибээстээн өрөспүүбүүкэни олохтоох аһынан-үөлүнэн хааччыйыыга оҥорон таһаарыы үлэтэ күүһүрүөҕэ, — диэн этэр Андрей Тарасенко.
Маны сэргэ, тыа сирин биир кэлим сайыннарыы бырагырааматын чэрчитинэн тутуллан үлэҕэ киириэхтээх эбийиэктэр боппуруостарын туспа көрдүлэр. Бу сылга биһиги өрөспүүбүлүкэбит дойду үрдүнэн саамай улахан үбүлээһини ылбыт. Ол курдук 1,3 миллиард солкуобай тыа сиригэр социальнай эбийиэктэри тутууга уонна өрөмүөннээһиҥҥэ көрүллүбүт.
2022 сылга бу бырагырааманан уопсайа 13 социальнай олус наадалаах эбийиэктэр аҕыс улууска тутуллан үлэҕэ киириэхтэрэ. Ол курдук Үөһээ Бүлүү, Сунтаар, Бүлүү, Уус Алдан улуустарыгар – 4 уһуйаан, 3 оскуола — Бүлүү, Уус Алдан, Хаҥалас улуустарыгар, 2 оскуола-уһуйаан Эдьигээҥҥэ уонна Чурапчыга, култуура-успуорт комплекса – Үөһээ Бүлүүгэ, бассейннаах успуорт комплекса – Сунтаарга тутуллуохтара, ону сэргэ Үөһээ Бүлүүгэ уулуссаны сырдатыы үлэтэ ыытыллыахтаах.
РФ Тыатын хаһаайыстыбатын министиэристибэтигэр иһитиннэрбиттэринэн, бу бырагыраама чэрчитинэн өссө Нам улууһугар успуорт саалатыгар хапытаалынай өрөмүөн, Сунтаарга уулуссаны сырдатыы ыытыллыахтаах эбит. Ону сэргэ, Сунтаар,Уус Алдан улуустарын доруобуйа харыстабылын тэрилтэлэригэр биэс санитарнай массыына уонна Сунтаар, Чурапчы улуустарыгар оскуолаҕа уонна култуура эбийиэктэригэр икки тиэхиньикэ былааннанар.

Ульяна ЗАХАРОВА, edersaas.ru