“Тыа сирин эмчитэ/биэлсэрэ” бырагыраама биһирэнэр

Бөлөххө киир:

“Тыа сирин эмчитэ/биэлсэрэ” бырагырааманы сэҥээрээччи уонна туһанааччы өрөспүүбүлүкэҕэ элбии турарын туһунан СӨ Доруобуйаҕа харыстабылын министиэристибэтэ иһитиннэрэр.

2012 cыллаахха дойдуга “Тыа сирин эмчитэ” бырагыраама олоххо киирэригэр мунаарааччылар, саарбахтааччылар бааллара. Ол гынан баран, 10 сыл иһигэр, 2012-2021 сылларга Саха сирин нэһилиэнньэлээх пууннарыгар, куорат тииптээх  бөһүөлэктэргэ уонна 50 тыһыынчаҕа тиийэр нэһилиэнньэлээх дьоҕус куораттарга  1015 быраас үлэлии тиийбитэ. Кинилэртэн 221 исписэлиис Арктикаҕа үлэлии барарга быһаарыммыта.

Бу бырагыраама көдьүүстээҕин учуоттаан, сотору кэминэн  биэлсэрдэргэ аналлаах эмиэ маннык бырагыраама олоххо киллэриллибитэ. Ол түмүгэр “Тыа сирин биэлсэрэ” бырагырааманан 108 исписэлиис туһанан, 29 биэлсэр Арктика зонатыгар барбыта.

“Тыа сирин эмчитэ/биэлсэрэ” бырагыраама тыа сиригэр быраастары уонна орто сүһүөх мэдиссиинискэй үлэһиттэри ыытарга көдьүүстээх. Бырагырааманан үлэлии барааччыларга биир кэмнээх төлөбүр: быраастарга – 2 мөлүйүөн, биэлсэрдэргэ 1 мөлүйүөн көрүллэр. Онтон 50 тыһыынчаҕа тиийэр нэһилиэнньэлээх куораттарга үлэлии кэлбит быраастарга 1 мөлүйүөн, биэлсэрдэргэ 500 тыһыынча бэриллэр.

2022 сылга бу бырагыраамаҕа 147 исписэлиис кыттыаҕа. Кинилэр “Тыа сирин эмчитэ/биэлсэрэ”  уонна “Доруобуйа харыстабылын бастакы сүһүөх звенотун модернизациялааһын” бырагыраамалар чэрчилэринэн тыа сиригэр үлэлии барыахтара.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0