Дойду баһылыга Владимир Путин 2019 сыллаахха доруобуйа харыстабылын бастакы сүһүөх уонна суһал көмө үлэһиттэрин социальнай өттүнэн хааччыйарга дьаһаллары ылбыта.
edersaas.ru
Владимир Путин эдэр исписэлиистэр 10 сыл миэстэтигэр үлэлээтэхтэринэ, тэрилтэ биэрбит дьиэтин бас билиигэ бэйэлэригэр хаалларыахтарын сөбүн ыйбыта. Ону таһынан, дьиэ туттуон баҕалаах мэдиссиинэ үлэһиттэригэр сир учаастагын бастакы уочарат биэрэргэ сорудахтаабыта. Кинилэргэ ипотека кирэдьиитэ чэпчэтиилээх усулуобуйаҕа бэриллэр, оҕо уһуйааннарыгар уочарата суох ылыллаллар.
Бу барыта тыа сиригэр эдэр исписэлиистэр баран үлэлииллэригэр, олохсуйалларыгар бигэ тирэҕинэн буолар.
СӨ Доруобуйа харыстабылын министиэристибэтэ иһитиннэрбитинэн, ахсынньы 19 күнүгэр Ньурба улууһун Чуукаар сэлиэнньэтигэр хас да саҥа эбийиэк үлэҕэ киирдэ.
Бастатан туран, эдэр исписэлиистэргэ саҥа дьиэ күлүүһүн туттаралларыгар нэһилиэккэ инфраструктура сайдан, социальнай суолталаах эбийиэктэр тутулланнар, сэлиэнньэҕэ эдэр каадырдар үлэлии хаалалларын бэлиэтээтэ.
Саҥа дьиэ күлүүһүн ылбыт эдэр дьон ортотугар Чуукаар балыыһатын бырааһа Парасковья Сергеева баар.
«Саҥа дьиэҕэ киириэхпитигэр диэри кыра оҕобутунуун төрөппүттэрбит дьиэлэригэр кыараҕастык олордубут. Биһиэхэ уопсай дьиэҕэ бэриллибит 46 кв. м иэннээх дьиэбит тупсаҕай оҥоһуулаах, сылаас уонна киһи эрэ кута-сүрэ тохтуур”, — диэн эдэр быраас төрөөбүт нэһилиэгин, Ньурба улууһун Киин балыыһатын уонна СӨ Доруобуйа харыстабылын министиэристибэтин салалталарыгар Саҥа дьылы көрсө маннык күндү бэлэҕи оҥорбуттарыгар ис сүрэҕиттэн махтанна.
Кини М.К.Аммосов аатынан ХИФУ Медицина институтун быйыл бүтэрэн, төрөөбүт дойдутугар бэйэтин баҕатынан үлэлии кэлбитэ. Үлэтин балаҕан ыйыгар Чуукаар балыыһатыттан саҕалаабыта. Эдэр быраас балыыһа кэлэктиибэ иллээҕин-эйэлээҕин, олохтоох киһи буоларынан барыларын билэрин, онон үлэлииргэ чэпчэкитин уонна үлэтин сөбүлүүрүн туһунан кэпсээтэ.
Надежда ЕГОРОВА, “Саха сирэ”, edersaas.ru