“Тыа сирин бастыҥ дьиэ кэргэнэ-2017” өрөспүүбүлүкэтээҕи фестиваль Мэҥэ Хаҥалас Лоомтукатыгар буолан ааста.
Санатар буоллахха, “Бастыҥ дьиэ кэргэн” фестиваль хас да түһүмэхтээх. Онно “Тыа сирин бастыҥ дьиэ кэргэнэ”, “Бастыҥ эдэр дьиэ кэргэн”, о.д.а. түһүмэхтэргэ кыайыылаахтары талаллар. Фестиваль элбэх оҕолоох буолууну тарҕатар, дьиэ кэргэн экономикатын, үгэстэрин, сыаннастарын сайыннарар, төрөппүттэр эппиэтинэстэрин үрдэтэр сыаллаах-соруктаах.
Куонкуруһу СӨ ыччакка, дьиэ кэргэн бэлиитикэтигэр министиэристибэтэ, Мэҥэ Хаҥалас улууһун дьаһалтата, “Саха сиринээҕи норуот педагогикатын ассоциацията”, Дьахталлар түмсүүлэрин сойууһа уонна “Арассыыйа дьиэ кэргэнэ” уопсастыбаннай түмсүү кыттыһан тэрийдилэр.
“Тыа сирин бастыҥ дьиэ кэргэнэ” куонкуруска ыаллар бэйэлэрэ бырайыактаах кэлэллэр. Онно бэйэлэрин хаһаайыстыбаларын хайдах сайыннаралларыттан саҕалаан, оҕону иитиигэ, дьиэни-уоту толору хааччыллыылаах оҥорууга, тэлгэһэни киэргэтиигэ, дьиэ кэргэн туризмын тэрийиигэ, кыраайы үөрэтии педагогикатыгар, оҕону кытта оонньуур эйгэни сайыннарыыга, аҕа ууһун удьуор утумун тэнитиигэ, сахалыы таҥас-сап суолтатын үрдэтиигэ, о.д.а. ураты көрүүлээх, атын дьоҥҥо туһалаах бырайыак буолуохтаах. Ыаллар бары сахалыы таҥнан, ырыаны-тойугу, үҥкүүнү бэлэмнээн, түһүлгэлэрин киэргэтэн, астарын-үөллэрин илдьэ, ох курдук оҥостон кэлэллэр.
Быйыл Чурапчыттан, Хаҥаластан, Амматтан, Уус Алдантан, Мэҥэ Хаҥаластан, Тааттаттан сэттэ дьиэ кэргэн кытынна.
Прокопьевтар дьиэ кэргэттэрэ.
Манна Мэҥэ Хаҥалас улууһуттан үс оҕолоох Афанасий Юрьевич уонна Ньургуйаана Семеновна Прокопьевтар кыайыылааҕынан ааттаннылар. Кинилэр дьиэ кэргэн экономикатыгар сыһыаннаах бырайыагы көмүскээтилэр. Бу бырайыак бэйэлэрин уопуттарыгар, хаһаайыстыбаларыгар сыһыаннаах. Ньургуйаана Семеновна кондитерскай оҥоһуктары оҥорон атыылаан, бизнес арыйбыта. Аҕа баһылык хаһаайыстыбатын сайыннарар, оҕолорун үлэнэн иитэллэр. Дьиэлэрин оҥостон, киэргэтэн, оннооҕор кыһыҥҥы саады туппуттар. Прокопьевтар салгыы өрөспүүбүлүкэтээҕи “Сыл бастыҥ дьиэ кэргэнэ” фестивальга кыттыахтара.
Фестиваль иккис түһүмэҕэ бэс ыйын 25 күнүгэр Ньурба улууһун Дьаархан нэһилиэгэр ыытыллыа. Бу түһүмэх Бүлүү умнаһын улуустарын дьиэ кэргэттэрин түмүөҕэ.
Ангелина Васильева, “Саха сирэ” хаһыат, edersaas.ru
