Тыа сиригэр бэтэринээр тиийбэтин үрдүнэн эдэримситэллэр уонна сарбыйаллар
Бу дьыл тохсунньу 1 күнүнээҕи туругунан, бэтэринээрийэ сулууспатыгар 1833 киһи үлэлиирэ. Ил Дархан дохуот кээмэйин үрдэтэр, бүддьүөт ороскуотун сүрүннүүр дьаһалыгар олоҕуран, олунньу 1 күнүттэн каадыр ахсаана 78,5 штатынан сарбылынна. Бу кэмҥэ өрөспүүбүлүкэ бэтэринээрдэринэн 80, ити иһигэр хотугу улуустарга 68-75 бырыһыан хааччыллан олорор.
edersaas.ru
Бэтэринээрдэр орто саастара – 43. Онон, сулууспа салалтата эдэримситии суолун тутуһара оруннаах. Быйыл Тыа хаһаайыстыбатын академиятын уонна тыа хаһаайыстыбатын техникумун бүтэрбиттэртэн 42 эдэр исписэлиис идэтинэн үлэ булбут. Ону тэҥэ 184 исписэлиис идэтин үрдэтиммит. Бэтэринээрийэ департамена 2027 сылга диэри төһө каадырга наадыйарыгар сабаҕалааһын оҥорон, Экономика уонна Үөрэх, наука министиэристибэлэригэр түһэрбит.
Биллэрин курдук, бэтэринээр үлэтэ киһи доруобуйатыгар сэрэхтээх-кутталлаах идэҕэ киирэр: кыыл-сүөл сыстыганнаах ыарыыларын кытта күннэтэ алтыһаллар, сорох ардыгар бэйэлэрэ сутуллуохтарын син. Ити гынан баран, хамнас да, чэпчэтии да ырааҕынан сөп түбэспэттэр. Бэтэринээрдэр бу күҥҥэ сыччах коммунальнай өҥөҕө эрэ аҕыйах бырыһыан чэпчэтиинэн туһаналлар. Онон тыа сиригэр эдэр дьону угуйарга уустуга биллэр.
Василий НИКИФОРОВ, edersaas.ru