Бу сыл тохсунньу 1 күнүттэн тыа сиригэр мэдиссиинискэй үлэһиттэр эми-тому атыылыыллара көҥүллэннэ.
edersaas.ru
РФ Доруобуйа харыстабылын министиэристибэтэ иһитиннэрэринэн, маннык уларыйыы аптыаката суох нэһилиэнньэлээх пууннар олохтоохторо эминэн хааччыллыыга баар кыһалҕаларын быһаарыаҕа. Аптыаката суох нэһилиэнньэ дьоно чугастааҕы бөһүөлэктэргэ, оройуон киинигэр эбэтэр куоракка чэпчэтиинэн туһанар эмтэрин уо.д.а. препараттары ыла кэлэргэ күһэллиэхтэрэ суоҕа.
Онон, нэһилиэнньэлээх пууннар амбулаторияларыгар, биэлсэр-акушер пууннарыгар уонна быраас уопсай быраактыкатын кииннэригэр мэдиссиинискэй үлэһиттэр чэпчэтиилээх эминэн туһанар араҥаны наадалаах эмтэринэн хааччыйар уонна нэһилиэнньэҕэ эми-тому атыылыыр бырааптаныахтара. Маннык көҥүл урут фармация үлэһиттэригэр эрэ бэриллэрэ.
Доруобуйа харыстабылын миниистирэ Михаил Мурашко саҥа быраабылалары олоххо түргэнник киллэрэр туһугар, тыа сиригэр баар биэлсэр-акушер пууннарыгар уонна быраас амбулаторияларыгар көҥүлү биэрэргэ сорудахтаабыта.
Надежда ЕГОРОВА, «Саха сирэ», edersaas.ru