Тыа сиригэр – болҕомтону

Бөлөххө киир:

Тыа сиригэр талаһар биирдиилээн ыччат баар. Оттон үгүс эдэр дьон үчүгэй усулуобуйаҕа, сылаас дьиэҕэ олорон үлэҕэ талаһара чуолкай. Бу туһунан ыччат сөбүлүүр социальнай ситимигэр ыйытык оҥордум. Түмүгүн көрүөххэ.

Ыйытыкка уопсайа балтараа тыһыынча киһи кыттыыны ылла. Бастатан туран, Саха сиригэр ханна олороҕун диэн ыйытыыга, 869 киһи — куоракка, 714 киһи — тыа сиригэр диэтэ. “Куоракка олорор дьон, тыа сиригэр көһүө этигит дуо?» диэн ыйытыыга  692 киһи көһүө этибит диэтэ. Аҥаара (608 киһи) “суох” диэтэ. “Тыа сиригэр олорор буоллаххына, куоракка көһүөҥ этэ дуо?» диэн ыйытыыга 607 киһи «көһүөм этэ” диэтэ. 555 киһи тыа сириттэн куораттарга көһөр са­­наата суох.

Манан сиэттэрдэххэ, бырабыыталыстыба «Тыа сирин бүттүүн сайдыыта» бырагыраамата син көдьүүстээхтик үлэлиир диэн сабаҕалыахха сөп. Тыа сирин усулуобуйата сайдан, куоракка олорор дьон тыа сиригэр көһүө этибит дииллэрэ баар.

Саҥа сылтан бырабыыталыстыба эбии 3,6 миллиард солкуобайы сэ­­лиэнньэ сайдыытыгар көрдө. Көрүллүбүт харчы оскуолалар, уһуйааннар тутууларыгар, өрөмүөннэригэр, мэдиссиинэ эбийиэктэригэр тиэхиньикэ, көлө атыылаһарга туһуланыа.

«Биир ньыгыл Арассыыйа» сэкирэтээрин солбуйааччы Дмитрий Кобылкин:

— Бу бырагыраама чэрчитинэн, олоххо киириэхтээх эбийиэктэр тыа сирин олоҕун хаачыстыбатын тупсарыахтара. Тыа сиригэр куораттартан итэҕэһэ суох усулуобуйа баар буолуохтаах. Билигин Тыа хаһаайыстыбатын министиэристибэтэ эрэгийиэннэргэ бу сууманы түҥэтиэҕэ. Тыа сирин сайдыытыгар элбэх харчыны көрүү – биһиги сүрүн сыалбыт,  – диэн баартыйа сэкирэтээрин солбуйааччыта этэр.

Аны инстаграм социальнай ситимҥэ “тыа сиригэр тахсан тугунан дьарыктаныа этигитий” диэн ыйытыыга үгүстэр “бэйэ дьыалатынан” диэн эппиэттээтилэр. Ол эрээри, тыа ха­­һаайыстыбатынан дьарыктаныан баҕалаах ыччат олох аҕыйаҕа билиннэ.

“Тыа сирин бүттүүн сайдыыта” бырагыраамаҕа тыа хаһаайыстыбатыгар туһуланар бырагыраамалар эмиэ бааллар.

РФ премьер-миниистирэ Михаил Мишустин Бырабыыталыстыба мунньаҕар тыа сирин сайдыытын туһунан эмиэ эттэ:

— Судаарыстыбаннай бырагыраамаларга сайаапка күн-түүн киирэ турар. Онон эбии харчы көрүллэр. Хас биирдии дэриэбинэҕэ үчүгэй уһуйаан, ос­­куола баар буолуохтаах. Ону таһынан, интэриниэт, спортивнай былаһаакка, үчүгэй суол. Эрэгийиэннэр бу харчыны күүппүттэрэ ыраатта, – диир премьер-миниистир. 2021-2023 сылларга тыа сирин бүттүүн сайдыытын бырагырааматыгар  31 миллиард солкуобай бүддьүөттэн көрүллүбүтэ. Маны таһынан, тыа сиригэр туһуланар атын бырагыраамаларга өссө эбии 186 миллиард солкуобай көрүлүннэ. Бу судаарыстыбаннай бырагыраама Уһук Илин хас биирдии эрэгийиэнигэр олус наадалаах. Сэлиэнньэлэр сайдыахтарын наада, онуоха эдэр дьон олохсуйара булгуччулаах, – диэн этиитин түмүктээбит.

+1
0
+1
0
+1
0
+1
0
+1
0
+1
0
+1
0