Нам улууһугар бэйэ оҥорон таһаарар анал билиитэлэринэн дьон хаамарыгар уулуссаларын тупсараллар.
Кыһыл Сыыр сэлиэнньэтигэр (I Хомустаах) бэйэ сиригэр-уотугар оҥоһуллар анал билиитэлэринэн уулуссаларын тупсарыы саҕаланна. Өрөспүүбүлүкэ сүрүн архитектора Ирина Алексеева үлэ хаамыытын баран билистэ. Бу туһунан СӨ Ил Дархан архитектураҕа уонна куораты тутууга управлениетын пресс-сулууспата иһитиннэрэр.
«Марка-75» хампаанньа үлэтин былырыыҥҥыттан, Hess диэн тэрили атыылаһыаҕыттан, саҕалаабыт. Олохтоох оҥорон таһаарааччы бордюрдары, шлакоблоктары, араас быһыылаах-таһаалаах үрдүк хаачыстыбалаах тротуар билиитэлэрин оҥорор. Ону сэргэ, күҥҥэ 800 кв.м. суол кытаанах бүрүөһүнүн бэлэмнээн таһаарар. Атын билиитэлэртэн уратыта, быһыылара-таһаалара судургу буолан, уурарга, тэлгииргэ табыгастаахтар, онон үлэлииргэ түргэн. Бөҕөлөрө-таҕалара эмиэ бэлиэтэнэр.
«Кыһыл Сыырга бастакынан тротуардары Аммосов уул. 66, 66А уонна 70 ууруу саҕаланна. Бэдэрээччиттэр сөбүлээбиттэр. Хаачыстыбата көстөн иһиэ«, — диэн өрөспүүбүлүкэ сүрүн архитектора этэр.
Бэс ыйын 23 күнүгэр архитектордар хамаандалара Аппааныга, Хатырыкка, Партизаҥҥа, Ымыйахтаахха, Намҥа сырытта. Манна кинилэр «Куорат эйгэтин тэрийии» уонна «Уһук Илиҥҥэ 1000 тиэргэн» бырагыраамаҕа киирбиттэринэн тиэргэннэри, мини-пааркалары, биэрэк кытыыларын тупсаран оҥорууларын көрдүлэр, бэрэбиэркэлээтилэр.
Партизан сэлиэнньэтигэр быйыл Совхознай 13 уулуссаҕа тиэргэн тупсарыллыахтааҕа халаантан көһөрүллэн, Новай уулуссаҕа сынньанар сир оҥоһуллар. Атын сэлиэнньэлэргэ үлэ былаан уонна кыраапык быһыытынан салҕанар.
Намҥа биир улахан эбийиэгинэн биэрэккэ Максим Аммосов уулуссатыгар баар эбийиэк буолар. Үлэҕэ быйыл киллэриллиэхтээх култуура уонна духуобунай сайдыы киинин кытта үлэ ыытыллар. Эбийиэк АЛРОСА хампаанньа «Үүнэр көлүөнэ тус сыаллаах пуондатын» нөҥүө анал үбүлээһининэн, Максим Аммосов төрөөбүтэ 125 сылынан уонна Саха АССР тэриллибитэ 100 сылынан тутуллар. Үс мэндиэмэннээх дьиэ биэс тыһыынчаттан тахса кв.м. иэннээх буолар. Бырайыагы «Туйгун-проект» оҥорбут, архитектор – Екатерина Софронова. Бырайыагынан икки муоста, дьон хаамар сирэ, оҕолор оонньуур былаһааккалара, уо.д.а. былааннаналлар.