Мэҥэ Хаҥалас улууһугар Августина Хабарова салайааччылаах «Таммахтар» литературнай холбоһук Сомоҕолоһуу сылынан, өрөспүүбүлүкэ улуустарыгар баар айар түмсүүлэри кытары көрсөр, сибээһи ыкса олохтуур, тиһиктээхтик үлэлэһэр сыаллаах-соруктаах үлэтин-хамнаһын саҕалаата.
—Тэрээһиммит сыала-соруга: айар түмсүүлэри түмүү, үлэ үөрүйэҕин атастаһыы, ийэ тылга тапталы, ытыктабылы күүһүрдүү, айар дьоҕурдаах эдэр ыччаты кытта үлэлэһии, бэйэ-бэйэҕэ ыалдьыттаһыы, сибээһи тутуу. Итинник сыаллаах-соруктаах Майаҕа «Дьол түһүлгэтэ» сынньалаҥ дьиэтигэр ыаллыы улуустартан айар түмсүүлэри ыҥыран тэрээһин оҥордубут. Намтан «Отуу уота» (сал.Александр Дунаев), Горнайтан «Сыккыс» (Айталина Олесова), Уус Алдантан «Уһуктуу» (Галина Аммосова), Тааттаттан «Иэйии түһүлгэтэ» (Иннокентий Лукачевскай-Силис), Чурапчыттан «Чурапчы» (Римма Корякина-Хотууна), Дьокуускайтан «Сэргэлээх уоттара» (бөлөҕү салайан аҕалбыт Уйгулаана Портнягина), «Кырсаада» (Галина Басылайканова), «Көҥүл иэйии» (Илья Афанасьев —Алмаас, быйыл саҥа тэриллибит түмсүү) уонна Майаттан «Саһарҕа» (Валентина Аманатова, «Үһүс көлүөнэ оскуола») үөрүүлээх түһүлгэбит ыалдьыттарынан буоллулар. Мааны астаах сандалы тула олорон, хас биирдии түмсүү үлэтин хаһан саҕалаабытын, бу сылларга тугу ситиспиттэрин, түмсүүлэрэ төһө кэҥээбитин, туох үлэни ыыталларын, быйылгы былааннарын уо.д.а. билиһиннэрдилэр, хардарыта ыйытыыларга хоруйдаатылар. Ол кэннэ түмсүү чилиэннэрэ саҥа, сибиэһэй хоһооннорун ааҕан иһитиннэрдилэр, ырыа ыллаатыбыт, улуус бибилэтиэкэтигэр түмсүүлэр кинигэлэрин бэлэх ууннулар. Түһүлгэҕэ мустубут бары ыалдьыттарбытыгар «Таммахтар» литературнай холбоһук сүбэһитэ, оҕо суруйааччыта, Амма Аччыгыйын аатынан Судаарыстыбаннай бириэмийэ лауреата Константин Сосин олоҕун-дьаһаҕын туһунан аҕынна, айар үлэтиттэн бэрт элбэҕи кэпсээтэ, сүбэ-ама биэрдэ, — диир Августина Семеновна. Күүс-көмө буолбут улуустааҕы култуура уонна духуобунай сайдыы салайааччытыгар Дмитрий Аргуновка, «Кэскил» социальнай медико-психологическай кииҥҥэ (дириэктэр Матрена Птицына) , «Дьол түһүлгэтигэр» ( дириэктэр Лидия Павлова), Иван Брызгалов төрөппүт оҕолоругар айар түмсүүлэри түмэр сыаллаах үлэҕэ улахан өйөбүл буолбуттарыгар махтанар.
Тэрээһиҥҥэ кыттыбыт ыалдьыттар маннык көрсүһүүлэр, санаа атастаһыылара, ирэ-хоро сэһэргэһиилэр, быыһыгар көрдөөх-нардаах күрэхтэһиилэр айар куттаах дьоҥҥо олус наадаларын, туһалаахтарын, санааны кынаттыылларын бэлиэтээбиттэр. Санаа үллэстиитэ, хардарыта үөрэнии, сүбэ-ама, улахан үөрүйэхтээх дьон ыйыылара-кэрдиилэрэ, ыллыктаах тыллара үлэни көҕүлээн биэрэрин эппиттэр. Түмсүүлэргэ эдэрдэри күүскэ тардарга сүбэлэспиттэр. Итиэннэ маннык көрсүһүүнү бэйэлэригэр эмиэ тэрийиэх, онно өйөбүл, сүбэ-ама ылыах буолбуттар, тэрийээччилэргэ махтаммыттар.
Манна даҕатан эттэххэ, «Таммахтар» литературнай холбоһук саҥа сылга номнуо үһүс улахан тэрээһинэ. Ол курдук тохсунньу саҥатыгар «Мигалкин ааҕыыларын», тохсунньу бүтүүтүгэр «Брызгалов ааҕыыларын» үрдүк таһымнаахтык тэрийэн ыыппыттара.
Сардаана БАСНАЕВА, «Саха сирэ» хаһыат, edersaas.ru
Хаартыскалар: «Таммахтар» литературнай холбоһук