Бу күннэргэ Дьокуускай мэриятыгар улуустар землячестволарын бэрэстэбиитэллэрэ, уопсайа 35 киһи түмсэн, үлэ былаанын торумнаатылар, сонун сүүрээннэри, бырайыактары былааннаатылар.
Ол курдук, Дьокуускайдааҕы мэрия иһинэн улуустар Землячестволарын сэбиэтэ үлэлиэҕэ. Онно анал бырабылыанньа талылынна. Сэбиэт састаабар Таатта, Муома, Нам, Горнай, Алдан уонна Үөһээ Бүлүү улуустарын бэрэстэбиитэллэрэ киирдилэр. Үлэ биир бастакы хаамыытынан бэйэ бородууксуйатын оҥорон таһаарар урбаанньыттар киин куорат сылаас тохтобулларыгар астарын-үөллэрин атыылыахтара. Мэр Евгений Григорьев бэлиэтээбитинэн, сыл бүтэһигэр диэри Дьокуускайга эбии 20 саҥа сылаас тохтобул тутуллан үлэҕэ киириэҕэ. Өймөкөөн улууһун землячествотын салайааччыта Александр Колесов: «Бу тохтобулларга бэйэлэрин бородууксуйаларын атыылыыр урбаанньыттар аренда төлөбүрүттэн босхолонуохтара, кинилэр хомунаалынай өҥөлөрүн эрэ толуйуохтара. Онон улуустар урбаанньыттара актыыбынай кыттыыны ылалларыгар ыҥырабыт«, — диэн санаатын үллэһиннэ. Ити курдук, киин куорат тыа сирин кытта сомоҕолоһуутун бэлиэтин быһыытынан ыкса сибээһи олохтуур өссө биир сонун сүүрээн олоххо киириэҕэ.
Елена ПОТОЦКАЯ Саха сирэ хаһыат, edersaas.ru