Тыа сирин бибилэтиэкэлэригэр — суолталаах бэлэх

Ааптар: 
Бөлөххө киир:

Бу күннэргэ улуустарга  Саха АССР 100 сылыгар анаммыт тэрээһиннэр салҕанан бараллар.

Кэрэхсэбиллээҕэ баар, дьон бэйэтин ис иһиттэн баҕаран туран, араас бырайыактары толкуйдаан олоххо киллэрэллэр. Ол курдук, бу күннэргэ Мэҥэ Хаҥалас улууһун Төхтүр орто оскуолатын 1982 сыллаахха бүтэрбит дьон биир холобур буолар тэрээһини тэрийдилэр. Бу туһунан Төхтүр нэһилиэгин олохтооҕо Валентина Попова кэпсиир:

Биһиги кылааспыт оҕолоро биир күн батсаап бөлөхпүтүгэр сүбэлэһэн баран, улууспут алта нэһилиэгин  бибилэтиэкэлэригэр «История Якутии»диэн саҥа тахсыбыт үс туомнаах кинигэни бэлэх уунарга санаммыппыт.

Төрүөтэ – кылааһынньыкпыт, тыа сирин бибилэтиэкэрэ, олус наадалаах саҥа кинигэ бэчээттэнэн тахсыбытын туһунан суруйбута. Биһиги сүбэлэһэн баран, харчы хомуйаат, Төхтүр, Томтор, Бэдьимэ, Ороссолуода, Сыымах, Чыамайыкы нэһилиэктэрин бибилэтиэкэлэригэр наадалаах кинигэлэри атыылаһан ылан, бэлэх ууннубут.

Төхтүр оскуолатыгар биһиги бу нэһилиэктэртэн мустан биир кылааска үөрэммиппит уонна күн бүгүнүгэр диэри сибээспитин быспаппыт.

Бу биһиги оскуолабытын бүтэрбиппит 40 сылыгар үтүө аахсыйабытынан буолар.  

Көмөбүтүн Саха АССР 100 сылыгар уонна өрөспүүбүлүкэҕэ үөрэҕирии эйгэтигэр Ааҕыы сылыгар “Кинигэтэ бэлэхтээ” аахсыйаҕа анаатыбыт.

… Ити курдук, ким эрэ ыйыытын уонна ыҥырыытын кэттэспэккэ, дьон бэйэлэрин баҕаларынан үтүө дьыаланы оҥорор бэлэхтэрэ сүүс төгүл күндү буоллаҕа.

Елена ПОТОЦКАЯ, “Саха сирэ” хаһыат, edersaas.ru

Хаартыска — Валентина Попова тиксэриитэ.

+1
0
+1
0
+1
0
+1
0
+1
0
+1
0
+1
0