Сүөһү аһылыгын бэлэмнээһин уонна тыа хаһаайыстыбатын табаары оҥорооччуларын өйөөһүн – Саха сирин Ил Дарханын болҕомтотугар

Саха сиригэр сүөһү аһылыгын бэлэмнээһин хампаанньата бара турар. Бүгүн 350 тыһыынча туонна оту кэбиһэн, былаан 74 % туолла.

Сүөһү аһылыгын бэлэмнээһин хаамыытын кытта Чурапчы оройуонугар оробуочай сырыытын кэмигэр Айсен Николаев билиһиннэрдэ. Өрөспүүбүлүкэ баһылыга Хатылы нэһилиэгэр “Попов М.Д.” бааһынай хаһаайыстыбатын ходуһаларыгар сырытта уонна өрөспүүбүлүкэ миниистирдэрин кэбиниэтин чилиэннэрин уонна муниципалитет бэрэстэбиитэллэрин кытта сүбэ мунньаҕы ыытта.

Тыа хаһаайыстыбатын миниистирэ Александр Атласов этэринэн, атырдьах ыйын 17 күнүнээҕи туругунан өрөспүүбүлүкэҕэ 349,5 тыһ. туонна от соҕотуопкаланна. Чурапчы улууһа сүрүн ходуһаларын оттообут, билигин дьоҕус биригээдэлэр ыраах учаастактарга оттуу бараллар. Күһүн бүтүөр диэри оройуон 91-93% оту бэлэмниир соруктаах.

Мунньахха нэһилиэктэр баһылыктара уонна фермердэр мелиорация тиһигин чөлүгэр түһэрэргэ уонна сэбиэскэй кэмҥэ туһаныллыбыт ыраах ходуһалары баһылыырга эттилэр. Маныаха тыа хаһаайыстыбатын үлэһиттэригэр үп-харчы уонна күүстээх тиэхиньикэ наада.

Ону сэргэ кинилэр оту тиэйиигэ өйөбүлү оҥороллоругар көрдөстүлэр. Ол курдук, хас да биригээдэ Өлүөнэ 4 арыытыгар оттууллар. Кыһын оту тиэйиигэ дизельнэй уматык элбэх ирдэнэр.

Айсен Николаев бырабыыталыстыба оту тиэйии ороскуотун толуйууга үбү көрүө диэтэ. Өрөспүүбүлүкэ баһылыга бу күһүн мелиорация тиһигин чөлүгэр түһэрии боппуруостарыгар киэҥ ыҥырыылаах мунньаҕы тэрийэргэ соруйда.

“Өрөспүүбүлүкэҕэ үгүс сылларга тыа хаһаайыстыбатыгар самылык салаа курдук сыһыаннаһаллара. Ол эрээри бүгүн Саха сирин тыа хаһаайыстыбатын бородууксуйатын оҥорооччулара бэйэлэрин хаһаайыстыбаларын күүскэ сайыннараллар. Биһиги сорукпут – кинилэри өйөөһүн”, — диэн Айсен Сергеевич бэлиэтээтэ.

Ил Дархан иһитиннэрбитинэн, чугастааҕы сылларга үүт уонна эт оҥоһуутун үбүлээһин 1,5 төгүл үрдүөхтээх. Маныаха сүрүн усулуобуйа – сүөһү ахсаанын элбэтии.

Айсен Николаевка Чурапчы улууһун тыа хаһаайыстыбатын сайдыытыгар агентствотын тэрийии бырайыагын кэпсээтилэр. Бу сыала – оройуон табаары оҥорооччуларыгар юридическай, экэниэмикэ өттүнэн сүбэ-ама. Ил Дархан  бырайыак ситиһиилээхтик киирдэҕинэ атын оройуоннарга эмиэ киириэҕэ диэн бэлиэтээтэ.

Саха Өрөспүүбүлүкэтин Ил Дарханын уонна

Саха Өрөспүүбүлүкэтин Бырабыыталыстыбатын пресс-сулууспата.

Бэлэмнээтэ Женни СТРЮКОВА

Хаартыска- саайтан.