Ытыктабыллаах тыа хаһаайыстыбатын уонна астыыр-таҥастыыр салаа үлэһиттэрэ, бэтэрээннэрэ! Эһигини идэлээх бырааһынньыкпытынан – Россияҕа тыа хаһаайыстыбатын уонна астыыр-таҥастыыр промышленность үлэһиттэрин күнүнэн итиитик-истиҥник эҕэрдэлиибин!
Бу ыарахаттартан толлубакка, тыа сиригэр олорор, сүөһү иитиитигэр, сиртэн үүнээйини ылыыга, тыа хаһаайыстыбатын бородууксуйатын оҥорон таһаарыыга сыралаһан үлэлиир дьону түмэр, сомоҕолуур бэлиэ бырааһынньык. Кэм-кэрдии хаамыытынан олох сайдан иһэр, ол эрээри тыа сирин үлэтэ тыын суолтатын сүтэрбэт. Тоҕо диэтэххэ, дойду ас-үөл өттүнэн куттала суох буолуутун тыа хаһаайыстыбата, хотон-хонуу үлэһиттэрэ, үлэни-хамнаһы сүрүннүүр исписэлиистэр хааччыйаллар.
Тыйыс айылҕалаах Саха сирэ Уһун Илиҥҥэ биир саамай бигэтик сайдар регион буолар. Агропромышленнай комплекс өрөспүүбүлүкэ социальнай-экономическэй сайдыытыгар боччумнаах оруолу ылар. Күн бүгүн тыа хаһаайыстыбатын күннээҕи үлэтигэр-хамнаһыгар, бородууксуйаны оҥорон таһаарыыга аныгы тиэхиньикэ, саҥа технология, бастыҥ уопут уонна наука ситиһиилэрэ туһаныллаллар. Тыа сирэ сайдыыга киэҥник хардыылыыр – кини социальнай мөссүөнэ уларыйан, тыа хаһаайыстыбатын көрдөрүүтэ тупсан иһэр. Россия федерациятыттан, өрөспүүбүлүкэ бүддьүөтүттэн көрүллэр үпкэ тирэҕирэн, сыллата ыһыы иэнэ кэҥэтиллэр, сүөһү иитэр комплекстар тутуллаллар, астыыр-таҥастыыр салаа эбийиэктэрэ үлэҕэ киллэриллэллэр, саҥа тиэхиньикэ атыылаһыллар, үлэ технологията тупсарыллар. Өрөспүүбүлүкэтээҕи уонна федеральнай тус сыаллаах бырагыраамалар чэрчилэринэн, элбэх социальнай эбийиэк тутуллан үлэҕэ киллэриллэр, АПК үлэһиттэрин уонна эдэр исписэлиистэрин олорор усулуобуйалара болҕомтоҕо тутуллар, саҥа саҕалыыр эдэр бааһынайдарга уонна үлэлэрин-хамнастарын кэҥэтэр бааһынайдарга анаммыт граннарынан улахан хамсааһын тэриллэр. Бу барыта тыа сирин, аграрнай производствоны өйүүр судаарыстыба бэлиитикэтигэр тирэҕирэр.
Чахчы элбэх оҥоһулунна, ол эрээри ситиһиллибитинэн уоскуйар табыллыбат. Биһиги тэрилтэлэрбит, хаһаайыстыбаларбыт, бородууксуйабыт күрэстэһэр кыахтарын улаатыннарарга, АПК үлэһиттэрин хамнастарын үрдэтэргэ, тыа сиригэр олорор-үлэлиир табыгастаах усулуобуйаны тэрийэргэ иннибитигэр өссө элбэх үлэ күүтэр. «Тыа хаһаайыстыбатын сайдыытын туһунан» Саха Өрөспүүбүлүкэтин сокуонун, «Сылгыны үөрдээн иитиини сайыннарар дьаһаллар тустарынан» Ил Дархан ыйааҕын олоххо киллэрэр үлэни-хамнаһы тэрийиэхпит.
Ытыктабыллаах тыа хаһаайыстыбатын уонна астыыр-таҥастыыр салаа үлэһиттэрэ, өрөспүүбүлүкэ аграрнай экономикатын бөҕөргөтүүгэ таһаарыылаах үлэҕит иһин ис сүрэхпиттэн махтанабын. Күндү бэтэрээннэр, үтүө суобастаах үлэҕит иһин эһиэхэ дириҥник сүгүрүйэбин! Баҕарабын ыраас халлааны, быйаҥнаах бааһынаны, үрдүк үүнүүнү уонна дьоһун дохуоту! Чэгиэн-чэбдик доруобуйаны, тус бэйэҕитигэр уонна чугас дьоҥҥутугар, дьиэ кэргэттэргитигэр ситиһиини, дьолу-соргуну!
Истиҥ эҕэрдэни кытары
Петр АЛЕКСЕЕВ,
Бырабыыталыстыба Бэрэссэдээтэлин бастакы солбуйааччы – Тыа хаһаайыстыбатын уонна ас-үөл бэлиитикэтин миниистирэ. “Саха сирэ” хаһыат, edersaas.ru сайтка анаан.