“Туймаада” ҮХАПХ быйыл өрөспүүбүлүкэ улуустарыгар ынах сүөһү турар улахан хотоннорун аныгы технологиянан салгыы туттарыаҕа.
Ол курдук, Тыа хаһаайыстыбатын уонна ас-үөл бэлиитикэтин министиэристибэтин бирикээһигэр олоҕуран, хампаанньа Уус Алдан улууһугар “Танда” ТХПК-гэр, Аммаҕа “Илгэ” ХЭУо-ҕа, Чурапчы Одьулуунугар “Комплекс” бааһынай хаһаайыстыбаҕа, Мэҥэ Хаҥалас Тумулугар Таисия Десяткина салайар хаһаайыстыбатыгар комплекс иккис уочаратын уонна Бүлүүгэ I Күүлэт нэһилиэгин кэпэрэтиибигэр сакаасчыт быһыытынан туттараары үс өрүттээх дуогабарга илии баттаһа сылдьар. Онон кэлэр кыстыгы көрсө саҥа хотоннор үлэҕэ киириэхтэрэ.
Балары таһынан Тыа хаһаайыстыбатын уонна ас-үөл бэлиитикэтин министиэристибэтин былаанын сүнньүнэн быйыл Мэҥэ Хаҥаласка “Хорообут” ХЭУо (дириэктэр Прокопий Плотников) бэйэтин кыаҕынан улахан хотон туттаары бэлэмнэнэр. Ленскэй уонна Өлүөхүмэ улуустарыгар хортуоппуй уурар-харайар эбийиэктэр тутуллан киириэхтэрэ.
Онон, тыа сиригэр улахан кээмэйдээх тутуулар кириисистэн иҥнибэккэ, салгыы тутуллар суоллара тобуллар.
Василий НИКИФОРОВ.