Тыа хаһаайыстыбатын сокуонугар уларытыыны киллэрии боппуруостарын ырыттылар
СӨ Бырабыыталыстыбата өрөспүүбүлүкэҕэ тыа хаһаайыстыбата сайдыытын туһунан сокуонугар уларытыыны киллэрии ыйааҕын бырайыагын ылынна.
edersaas.ru
Бу туһунан СӨ Бырабыыталыстыбатын уочараттаах видеонан сибээс мунньаҕар ырыттылар. СӨ Бырабыыталыстыбатын «Саха сиригэр тыа хаһаайыстыбата сайдыытын туһунан» өрөспүүбүлүкэ сокуонугар уларытыылары киллэрии бырайыагын ыйааҕар кэккэ уларытыы киирдэ. Ол курдук, сокуон бырайыагын ылыныыга тыа хаһаайыстыбатын өйөөһүн миэрэлэрэ хаһаайыстыбаны тэрийииттэн, үбүлээһини көрүүттэн тыа хаһаайыстыбатын бырайыактара олоххо киириилэрэ, үлэ көрүҥүн кэҥээһинэ учуоттаныаҕа. Уопсайа 15 уларытыы бигэргэннэ, онтон 4-дэ тиэхиньиичэскэй ис хоһоонноох боппуруостар. Бырайыакка тыа хаһаайыстыбатын иһитиннэрэр-анаарар тиһигэ сокуонунан быһаарылынна. Ол эбэтэр өрөспүүбүлүкэ тыатын хаһаайыстыбатын туһунан мунньуллар иһитиннэрии эрэгийиэн информационнай тиһигэр киириэҕэ. Сокуон 5-с ыстатыйатыгар «научнай тэрилтэлэр , орто анал үөрэх, үрдүк үөрэх тэрилтэлэрэ научнай, тэхиньиичэскэй, үөрэтэр үлэлэрин иһинэн РФ Бырабыыталыстыбата бигэргэппит ыйыытыгар олоҕуран, тыа хаһаайыстыбатын бородууксуйатын оҥорон таһаарар буоллахтарына» тыа хаһаайыстыбатын субъегынан ааҕыллаллар диэн эбии 7-с пуун киирдэ. Маны тэҥэ «Пестицидтэри уонна агрохмикаттары куттала суох туттуу туһунан» Федеральнай Сокуон 22-с ыстатыйатыгар уларытыылары киллэрии туһунан» сокуон 12-с ыстатыйатыгар көннөрүү киирдэ. Бу манна олоҕуран, тыа хаһаайыстыбатын үүнүүлээх сирдэрин туһунан көрдөрүү учуотун федеральнай судаарыстыбаннай бүддьүөт тэрилтэлэрэ оҥороллор. Бу уонна да атын тыа хаһаайыстыбатын боппуруостарыгар туһаайыллыбыт өрөспүүбүлүкэ сокуоннарын федеральнай сокуону кытта сөп түбэһиннэрии туһунан видео сибээс мунньаҕар ырыттылар.
Елена ПОТОЦКАЯ, «Саха сирэ» хаһыат, edersaas.ru